விவசாயியிடம் வழிப்பறி சிறுவன் உட்பட 2 பேர் கைது

ஒல்லியம்பாளையம் பகுதியைச் சேர்ந்தவர் ஜானகிராமன், 40; விவசாயி. இவர், கடந்த 26ம் தேதி வயல்வெளிக்கு சென்றார். அப்போது அங்கு வந்த 6 மர்ம நபர்கள் ஜானகிராமனை மிரட்டி அவரிடமிருந்த 49 ஆயிரம் ரூபாயயை பறித்துக் கொண்டு தப்பியோடினர். இது குறித்த புகாரின் பேரில், திருநாவலுார் போலீசார் வழக்குப் பதிந்து விசாரித்து வந்தனர். இதற்கிடையே திருநாவலுார் சப் இன்ஸ்பெக்டர் ஆனந்தராஜ் தலைமையிலான போலீசார் ரோந்து சென்றபோது சந்தேகப்படும்படியான 2 பேரை பிடித்து விசாரித்தனர்.

அதில், அவர்கள் கடலுார் மாவட்டம், பண்ருட்டி தாலுகா வீசூர் பகுதியை சேர்ந்த அருள் மகன் அருண்பிரசாந்த், 21; மற்றும் 17 வயது சிறுவன் என்பதும் தெரிந்தது. மேலும், இருவரும் கடந்த 26ம் தேதி தனது நண்பர்கள் 4 பேருடன் சேர்ந்து ஜானகிராமனிடம் 49 ஆயிரம் ரூபாயை பறித்துச் சென்றதை ஒப்புக் கொண்டனர். அதனைத் தொடர்ந்து இருவர் மீதும் வழக்குப் பதிந்து, கைது செய்து, தலைமறைவாக உள்ள மற்ற 4 பேரைத் தேடி வருகின்றனர்.