டூ வீலர்கள் மோதல் - இளம் பெண் உயிரிழப்பு

கரூர் மாவட்டம், கடவூர் தாலுகா, ராசாப்பட்டி கிழக்கு பகுதியைச் சேர்ந்தவர் ராஜ்குமார் 36. இவரது மனைவி பாப்பா 28.இவர்களுக்கு இரண்டு குழந்தைகள் உள்ளனர். இந்நிலையில், நேற்று ஜனவரி 14-ஆம் தேதி இரவு 7 மணி அளவில் தரகம்பட்டியில் இருந்து வையம்பட்டி செல்லும் சாலையில் அவர்களது டூவீலரில் சென்று கொண்டு இருந்தனர். இவர்களது வாகனம் ரெட்டியபட்டி மகாலட்சுமி பேக்கரி அருகே சென்று கொண்டிருந்தபோது, கடவூர் தாலுக்கா எழுதிக்கோன்பட்டி பகுதியைச் சேர்ந்த மாரிமுத்து, 30- என்பவர், வேகமாக ஓட்டி வந்த டூ வீலர், ராஜ்குமார் ஓட்டி சென்ற டூவீலர் மீது மோதி விபத்து ஏற்பட்டது.

இந்த சம்பவத்தில் வாகனத்துடன் கீழே விழுந்ததில், பின்னால் அமர்ந்து வந்த ராஜ்குமார் மனைவி பாப்பாவுக்கு பலத்த காயம் ஏற்பட்டது. உடனடியாக அவரை மீட்டு, கரூர் அரசு மருத்துவக் கல்லூரி மருத்துவமனைக்கு கொண்டு சென்றனர். ஆயினும், செல்லும் வழியிலேயே பாப்பா உயிர் இழந்தார். இந்த சம்பவம் குறித்து ராஜ்குமார் அளித்த புகாரின் பேரில்,சம்பவ இடத்துக்கு விரைந்து வந்த காவல்துறையினர், உயிரிழந்த பாப்பாவின் உடலை உடற்கூறு ஆய்வுக்காக அனுப்பி வைத்து, இது தொடர்பாக டூவீலரை வேகமாக ஓட்டி விபத்து ஏற்படுத்திய மாரிமுத்து மீது வழக்கு பதிவு செய்துள்ளனர்.