டூவீலர்கள் மோதல்- கூலித் தொழிலாளி உயிரிழப்பு

கீழ்பென்னாத்தூர் அருகே நெடுங்காம்பூண்டி கிராமத்தைச் சேர்ந்தவர் அண்ணாமலை(46). கூலித் தொழிலாளி. சென்னை மறைமலை நகரில் உள்ள தனியார் கம்பெனி ஒன்றில் வேலை செய்து வந்ததாகவும், தீபாவளி பண்டிகைக்காக நெடுங்காம்பூண்டிக்கு சில தினங்களுக்கு முன்பு வந்ததாக கூறப்படுகிறது. இந்நிலையில் மோட்டார் சைக்கிளில் கீழ்பென்னாத்தூருக்கு வந்திருந்த அண்ணாமலை வீட்டிற்கு தேவையான பொருட்களை வாங்கிக்கொண்டு மீண்டும் நெடுங்காம்பூண்டி கிராமத்திற்கு சென்று கொண்டிருந்தார். அப்போது கூட்டுரோடு வளைவில் திரும்பிய போது திண்டிவனத்திலிருந்து திருவண்ணாமலை நோக்கி வேகமாக வந்து கொண்டிருந்த மோட்டார் சைக்கிள் ஒன்று அண்ணாமலையின் மோட்டார் சைக்கிள் பின்புறம் மோதியதில் தூக்கி வீசப்பட்ட அவர் தலையின் பின்பக்கம், நெற்றி, மூக்கு உள்பட பல இடங்களில் பலத்த காயமடைந்து சம்பவ இடத்திலேயே பரிதாபமாக இறந்தார். இது குறித்த தகவல் அறிந்ததும் கீழ்பென்னாத்தூர் போலீஸ் இன்ஸ்பெக்டர் கோவிந்தசாமி, சிறப்பு சப்இன்ஸ்பெக்டர் சக்கரவர்த்தி மற்றும் போலீசார் சம்பவ இடத்திற்கு விரைந்து சென்று இறந்த அண்ணாமலை பிரேதத்தை கைப்பற்றி பரிசோதனைக்காக திருவண்ணாமலை மாவட்ட அரசு மருத்துவமனைக்கு அனுப்பி வைத்தனர். இதில் விபத்து ஏற்படுத்திய நபருக்கும் பலத்த காயம் அடைந்து திருவண்ணாமலை அரசு மருத்துவமனையில் சிகிச்சை பெற்று வருகிறார். அவர் யார்? எந்த ஊரைச் சேர்ந்தவர்? என்ற விவரங்கள் தெரியவில்லை. மேலும் விபத்து குறித்து போலீசார் தீவிர விசாரணை மேற்கொண்டு வருகின்றனர்.