விஜய் புதிய கட்சி அறிவிப்பு : ஓசூரில் விஜய் ரசிகர்கள் கொண்டாட்டம்

நடிகர் விஜய் இன்று தமிழக வெற்றி கழகம் என்ற பெயரில் புதிய கட்சியை அறிவித்துள்ளார். இந்த அறிவிப்பு விஜய் ரசிகர்கள் மற்றும் விஜய் மக்கள் இயக்க நிர்வாகிகள் மத்தியில் பெரும் வரவேற்பையும் உற்சாகத்தையும் ஏற்படுத்தி உள்ளது.

இந்த கட்சி அறிவிப்பை கொண்டாடும் வகையில் விஜய் ரசிகர்கள் தமிழக முழுவதும் பட்டாசுகள் வெடித்து இனிப்பு வழங்கி மகிழ்ந்து வருகின்றனர். அந்த வகையில் ஓசூரில் நடிகர் விஜய் ரசிகர்கள் மற்றும் விஜய் மக்கள் இயக்கத்தை சார்ந்தவர்கள், கிருஷ்ணகிரி மாவட்ட விஜய் மக்கள் இயக்க மாவட்ட தலைவர் வடிவேல் மற்றும் மாவட்ட செயலாளர் சுரேஷ் ஆகியோர் தலைமையில் பட்டாசுகள் வெடித்து இனிப்பு வழங்கி கொண்டாடினர்.

முன்னதாக ஓசூர் காந்தி சிலை அருகில் உள்ள மகாத்மா காந்தி சிலைக்கு மாலை அணிவித்தனர். அதனை தொடர்ந்து அங்கிருந்த பொதுமக்களுக்கு இனிப்புகளை வழங்கி சாலையில் நடந்த சென்ற பெண்களுக்கு இலவசமாக சேலைகளையும் வழங்கினர். அதனைத்தொடர்ந்து ஓசூர் தாலுகா அலுவலகம் அருகில் உள்ள அண்ணா சிலைக்கு விஜய் ரசிகர்கள் மாலை அணிவித்து பட்டாசுகள் வெடித்து பொதுமக்களுக்கு இனிப்புகள் வழங்கி கொண்டாட்டத்தில் ஈடுபட்டனர்.

அதேபோல ஓசூர் முன்னாள் சட்டமன்ற உறுப்பினர் கோபிநாத் அவர்களை மரியாதை நிமித்தமாக சந்தித்த விஜய் ரசிகர்கள் அவருக்கு சால்வை அறிவித்து தங்களுக்கு அரசியல் ரீதியாக ஆலோசனைகளையும் ஆதரவையும் வழங்க வேண்டும் என கேட்டு கொண்டனர்.