ஊட்டியில் காட்டுமாடு உயிரிழப்பு!

நீலகிரி மாவட்டம் ஊட்டி வடக்கு வன சரகத்திற்கு உட்பட்ட புதுமந்து டம்ளர் மடக்கு பகுதியில் இன்று காலை சாலையோரம் காட்டுமாடு ஒன்று இறந்து கிடந்தது. இதுகுறித்து தகவல் அறிந்த வனத்துறையினர் சம்பவ இடத்திற்கு சென்று ஆய்வு செய்தனர். அனிக்கொரை கால்நடை உதவி மருத்துவர் உமாதேவி இறந்த காட்டு மாட்டின் உடலை உடற்கூறாய்வு செய்தார்.

இதுகுறித்து வனத்துறையினர் கூறுகையில், " இறந்து கிடந்தது பெண் காட்டுமாடு, மேய்ச்சலில் ஈடுபட்ட பின்னர் மேட்டுப்பகுதியில் இருந்து இறங்கி வரும்போது தவறி விழுந்து மூச்சு திணறலினால் இறந்திருக்கலாம். பிரேத பரிசோதனை முடிவில் முழு விவரம் தெரிய வரும், காட்டு மாட்டின் உடல் அந்த பகுதியில் புதைக்கப்பட்டது," என்றனர்.