சேலத்தில் பள்ளி வளாகத்தில் இறந்து கிடந்த தொழிலாளி

சேலம் மல்லமூப்பம்பட்டியில் உள்ள அரசு உயர்நிலைப்பள்ளி வளாகத்தில் நேற்று இரவு ஆண் ஒருவர் இறந்து கிடந்தார். இதுகுறித்து தகவல் கிடைத்ததும் சூரமங்கலம் போலீசார் சம்பவ இடத்துக்கு விரைந்து சென்றனர். இதையடுத்து அவரது உடலை போலீசார் மீட்டு பிரேத பரிசோதனைக்காக சேலம் அரசு ஆஸ்பத்திரிக்கு அனுப்பி வைத்தனர்.

பின்னர் போலீசார் நடத்திய விசாரணையில், இறந்து கிடந்தவர் அதே பகுதியை சேர்ந்த அழகேசன் (வயது 50) என்பதும், கூலித்தொழிலாளியான இவர் கடந்த சில ஆண்டுகளாக உடல்நலம் பாதிக்கப்பட்டு இருந்து வந்ததும் தெரியவந்தது.

இதனால் அவர் உடல்நலம் பாதிக்கப்பட்டு இறந்தாரா? அல்லது எப்படி இறந்தார்? என்பது குறித்து போலீசார் வழக்குப்பதிந்து விசாரணை நடத்தி வருகின்றனர். பள்ளி வளாகத்தில் தொழிலாளி இறந்து கிடந்த சம்பவம் அப்பகுதியில் பரபரப்பை ஏற்படுத்தியது.