அடையாளம் தெரியாத வாகனம் மோதி யாசகர் உயிரிழப்பு.

கரூர் மாவட்டம் அரவக்குறிச்சி காவல் நிலைய எல்லைக்குட்பட்ட கரூர்- திண்டுக்கல் சாலையில், ஆலமரத்துப்பட்டி பிரிவு அருகே, அக்டோபர் 26 ஆம் தேதி இரவு 11:45- மணி அளவில் யாசகம் பெற்று வாழ்ந்த ஒருவர் அவ்வழியாக நடந்து சென்று கொண்டிருந்தார். அவருக்கு வயது 50 முதல் 55 வயது வரை இருக்கும். அப்போது, அவ்வழியாக வேகமாக வந்த அடையாளம் தெரியாத வாகனம் ஒன்று, அவர் மீது மோதிவிட்டு மின்னல் வேகத்தில் நிற்காமல் சென்று விட்டது. இந்த சம்பவத்தில் அந்த நபருக்கு தலை, வலது மற்றும் இடது கால்களில் பலத்த காயம் அடைந்து சம்பவ இடத்தில் துடி துடித்து உயிரிழந்தார். இந்த சம்பவம் அறிந்த ஆலமரத்துப்பட்டி பகுதியைச் சேர்ந்த ராமலிங்கம் என்பவர் அளித்த தகவலின் பெயரில், சம்பவ இடத்துக்கு விரைந்து சென்ற அரவக்குறிச்சி காவல்துறையினர், உயிரிழந்த 50 முதல் 55 வயது மதிக்கத்தக்க அடையாளம் தெரியாத ஆண் உடலை கைப்பற்றி, அடையாளம் காண்பதற்காக கரூர் அரசு மருத்துவக் கல்லூரி மருத்துவமனை சவக்கிடங்கில் இருப்பு வைத்துள்ளனர். மேலும், விபத்து ஏற்ப்படுத்திவிட்டு நிற்காமல் சென்ற வாகனம் எது? அந்த வாகனத்தின் ஓட்டுனர் யார்? என்ற கோணத்தில் அரவக்குறிச்சி காவல்துறையினர் அக்டோபர் 27ஆம் தேதி வழக்கு பதிவு செய்து விசாரணை மேற்கொண்டு வருகின்றனர்.