சேலம் நெய்காரப்பட்டியில் சரக்கு வேனில் ரேஷன் அரிசி கடத்திய வாலிபர் கைது

சேலம் நெய்காரப்பட்டியில் ரேஷன் அரிசி கடத்தப்படுவதாக வட்ட வழங்கல் அலுவலர்களுக்கு தகவல் வந்தது. அதன்பேரில் பறக்கும் படை தாசில்தார் கோபாலகிருஷ்ணன் தலைமையில் வருவாய் அலுவலர்கள் சம்பவ இடத்துக்கு விரைந்து சென்றனர். அப்போது அங்கு சரக்கு வாகனத்தில் 2 பேர் ரேஷன் அரிசியை ஏற்றி கடத்த முயன்றது தெரியவந்தது. மேலும் அலுவலர்களை பார்த்ததும் அவர்கள் வாகனத்தை விட்டுவிட்டு அங்கிருந்து தப்பியோடி விட்டனர். இதையடுத்து சரக்கு வாகனத்துடன் 1½ டன் ரேஷன் அரிசியை அலுவலர்கள் பறிமுதல் செய்தனர். பின்னர் ரேஷன் அரிசியை உணவு பொருள் கடத்தல் தடுப்பு பிரிவு போலீசாரிடம் ஒப்படைத்தனர். இதுகுறித்து போலீசார் நடத்திய விசாரணையில் ரேஷன் அரிசியை கடத்தி வந்தது நெய்க்காரப்பட்டியை சேர்ந்த கிருஷ்ணராஜ் (வயது 30), தம்மநாயக்கன்பட்டியை சேர்ந்த செல்வமணி ஆகியோர் என்பது தெரியவந்தது. இதில் கிருஷ்ணராஜை போலீசார் கைது செய்தனர். செல்வமணியை தேடி வருகின்றனர்.