மனைவியின் சகோதரிக்கு கொலை மிரட்டல் - இளைஞர் கைது

சேலம் மாவட்டம், ஓமலூர் அடுத்த பனங்காட்டூர், மயிலம்பட்டியைச் சேர்ந்தவர் இருதயராஜ். இவரது மனைவி துர்காதேவி (34). இவர் சேலம் மாமாங்கத்தில் உள்ள தனியார் கார் ஷோரூமில் பணி புரிந்து வருகிறார்.

துர்காதேவியின் தங்கை நந்தினி தேவிக்கும், நாமக்கல் மாவட்டம், திருச்செங்கோட்டை சேர்ந்த தினேஷ்குமார் (31) என்பவருக்கும் கடந்த 4 ஆண்டுகளுக்கு முன்பு திருமணம் நடந்தது.

குடும்பத்தகராறு காரணமாக நந்தினி தேவி கணவனை பிரிந்தார். இவர்களது விவாகரத்து வழக்கு நீதிமன்றத்தில் நடந்து வருகிறது. இதனிடையே கடந்த வாரம் துர்காதேவி பணிபுரிந்து வரும் கார் ஷோரூமின் கஸ்டமர் கேர் எண்ணுக்கு போன் செய்த தினேஷ்குமார், துர்காதேவி குறித்து அவதூறாக பேசியுள்ளார். மேலும், அவரை கொலை செய்து விடுவதாகவும் மிரட்டினார்.

இது குறித்து சூரமங்கலம் மகளிர் போலீசில் துர்காதேவி புகார் அளித்தார். அதன்பேரில் பெண்களுக்கு எதிரான வன்கொடுமை வழக்குப்பதிவு செய்த போலீசார், தினேஷ்குமாரை கைது செய்து சிறையில் அடைத்தனர்.