காந்தி சாலையில் ஆக்கிரமிப்பு வாகனங்களால் நெரிசல்

ஸ்ரீபெரும்புதுார் காந்தி சாலையில், ஆக்கிரமிப்பு வாகனங்களால் தினமும் கடுமையான நெரிசல் ஏற்படுகிறது. ஸ்ரீபெரும்புதுார் பேரூராட்சியின் முக்கிய வழித்தடமாக காந்தி சாலை உள்ளது. இந்த சாலை வழியே ஸ்ரீபெரும்புதுார் பேருந்து நிலையத்திற்கு அனைத்து பேருந்துகளும் செல்கின்றன. இந்த சாலையில் தனியார் மருத்துவமனை, உணவகங்கள், வங்கிகள், வணிக கடைகள், பூக்கடைகள் அமைந்துள்ளன. இங்குள்ள 95 சதவீத கடைகளில் வாகன நிறுத்தும் இடம் அமைக்கப்படாமல் சாலையை ஓட்டி கட்டடங்கள் கட்டப்பட்டுள்ளன. இங்கு வருபவர்கள், தங்கள் மோட்டார் சைக்கிள்கள், கார்களை காந்தி சாலையின் இருபுறமும் ஆக்கிரமித்து நிறுத்தி வைக்கின்றனர். இதனால், சாலை குறுகலாகி போக்குவரத்து நெரிசல் ஏற்படுகிறது. விடுமுறை மற்றும் விசேஷ நாட்களில் இந்த சாலையில் மிக கடுமையான நெரிசல் ஏற்படுகிறது. சாலையை ஆக்கிரமித்து நிறுத்தும் வாகன ஓட்டிகள் மீதும் நடவடிக்கை எடுக்க வேண்டும் என, சமூக ஆர்வலர்கள் எதிர்பார்க்கின்றனர்.