ராசிபுரம் பகுதியில் அதிமுக சார்பில் வேட்பாளர் அறிமுகக் கூட்டம்

நாமக்கல் மாவட்ட அதிமுக சார்பில் ராசிபுரம் சட்டமன்றத் தொகுதிக்குட்பட்ட நகர, ஒன்றிய, பேரூர் பகுதிகளின் செயல்வீரர்கள் மற்றும் நாமக்கல் அதிமுக வேட்பாளர் ராஹா சு.தமிழ்மணி அறிமுகக் கூட்டம் நடைபெற்றது.

நாடாளுமன்றத் தேர்தலில் நாமக்கல் தொகுதியில் போட்டியிட கட்சியின் மாவட்ட வர்த்தக அணி செயலாளர் ராஹா சு.தமிழ்மணி நிறுத்தப்பட்டுள்ளார். இதனையொட்டி மாவட்டத்தின் பல்வேறு பகுதிகளில் செயல்வீரர்கள் கூட்டம் நடத்தப்பட்டு வருகிறது.

இதனையடுத்து ராசிபுரம் சட்டமன்றத் தொகுதிக்குட்பட்ட கட்சியினர் பங்கேற்ற இக்கூட்டத்தில் நாமக்கல் மாவட்ட அதிமுக செயலாளரும், முன்னாள் அமைச்சருமான பி.தங்கமணி தலைமையில் நடைபெற்ற கூட்டத்தில் கட்சியினர் திரளாக பங்கேற்றனர்.

இக்கூட்டத்தில் கட்சி நிர்வாகிகள்,தொண்டர்களுக்கு நாமக்கல் தொகுதியில் போட்டியிடும் வேட்பாளர் ராஹா சு.தமிழ்மணி அறிமுகம் செய்து வைக்கப்பட்டார். இதில் பேசிய முன்னாள் அமைச்சரும், மாவட்ட அதிமுக செயலாளருமான பி.தங்கமணி, அதிமுக ஆட்சி காலத்தில் நிறைவேற்றப்பட்ட மக்கள் நலத்திட்டங்கள்,

வளர்ச்சி திட்டப்பணிகள் போன்றவற்றை எடுத்துச்சொல்லி மக்களிடம் வாக்கு கேட்டு கட்சியினர் பணியாற்றிட வேண்டும் என்றார். இக்கூட்டத்தில் கட்சியின் மாநில மகளிரணி இணைச் செயலரும்,

முன்னாள் அமைச்சருமான வெ.சரோஜா, நகர கழக செயலாளர் எம்.பாலசுப்பிரமணியம், உள்ளிட்ட மாவட்ட, நகர, ஒன்றிய கழக செயலாளர்கள், ஒன்றிய நிர்வாகிகள், மகளிர் அணியினர், தொண்டர்கள் மற்றும் கூட்டணி கட்சினர் தேமுதிக வடக்கு மாவட்ட கழக செயலாளர் விஜய சரவணன் , ராசிபுரம் நகர கழக செயலாளர் அ.இளையராஜா,என பலர் பங்கேற்றனர்.