முதலமைச்சரின் மாநில இளைஞர் விருதுக்கு விண்ணப்பிக்கலாம்

சமுதாய வளர்ச்சிக்கு சேவையாற்றும் இளைஞர்களது பணியை அங்கீகரிக்கும் பொருட்டு ஒவ்வொரு ஆண்டும் முதல்-அமைச்சர் மாநில இளைஞர் விருது சுதந்திர தினத்தன்று 15 முதல் 35 வயது வரை உள்ள 3 ஆண்கள் மற்றும் 3 பெண்களுக்கு வழங்கப்பட்டு வருகிறது. இந்த விருது ரூ.1 லட்சம் ரொக்கம், பாராட்டுப் பத்திரம் மற்றும் பதக்கம் ஆகியவை உள்ளடக்கிதாகும். அதன்படி, 2024-ம் ஆண்டிற்கான முதலமைச்சர் மாநில இளைஞர் விருது வருகிற சுதந்திர தின விழாவில் முதல்-அமைச்சரால் வழங்கப்பட உள்ளது.

கடந்த நிதியாண்டில் மேற்கொள்ளப்பட்ட சேவைகள் மட்டுமே கருத்தில் கொள்ளப்படும். மத்திய, மாநில அரசுகள், பொதுத்துறை நிறுவனங்கள், பல்கலைக் கழகங்கள், கல்லூரிகள், பள்ளிகளில் பணியாற்றுபவர்கள் விண்ணப்பிக்க இயலாது. அடுத்த மாதம் (மே) 1-ந் தேதி முதல் 15-ந் தேதி மாலை 4 மணிக்குள் www.sdat.tn.gov.in என்ற இணையதளத்தில் விண்ணப்பங்களை சமர்பபிக்க வேண்டும்.

இணையதளத்தில் சமர்பிக்கப்பட்ட விண்ணப்ப படிவ நகல் மற்றும் உரிய ஆவணங்களின் 3 நகல்கள், 3 பாஸ்போர்ட் சைஸ் போட்டோ, காவல் துறையிடமிருந்து பெறப்பட்ட சரிபார்ப்பு சான்றிதழ் ஆகியவைகளை அடுத்த மாதம் 18-ந் தேதி மாலை 4 மணிக்குள் மாவட்ட விளையாட்டு அலுவலகத்தில் சமர்ப்பிக்க வேண்டும் என கலெக்டர் வளர்மதி தெரிவித்துள்ளார்.