70 வகை சீர்வரிசைகளுடன் எடப்பாடியாரை குளிர்வித்த ஐடி விங் ராஜ் சத்தியன்!

எம்ஜிஆர் மீது தீவிர ஆர்வம் கொண்ட பழனிசாமி 1974ஆம் ஆண்டு அதிமுகவில் இணைந்தார்.

தற்போது அதிமுக பொதுச்செயலாளர் எடப்பாடி பழனிசாமியின் 70-வது பிறந்தநாள் விழா நேற்று கொண்டாடப்பட்டது. இதையொட்டி தமிழகம் முழுவதும் அ.தி.மு.க.வினர் சிறப்பாக கொண்டாடினர்.

அதிமுக நிர்வாகிகள், தொண்டர்கள் கட்சி கொடியேற்றி இனிப்பு வழங்கி கொண்டாடினர். மேலும் பல்வேறு கோயில்களிலும் சிறப்பு வழிபாடு செய்து பொது மக்களுக்கு அன்னதானம் வழங்கினர்.

எடப்பாடி பழனிசாமி பிறந்தநாளையொட்டி நடிகரும், தமிழக வெற்றிக் கழகத்தின் தலைவருமான விஜய் சமூக வலைதளத்தில் தனது வாழ்த்துகளைத் தெரிவித்தார்.

அதனைத் தொடர்ந்து தமிழக பாஜக மாநில தலைவர் அண்ணாமலை வாழ்த்து தெரிவித்தார்.

அதிமுக பொதுச்செயலாளர் எடப்பாடி பழனிசாமி அவர்களின் பிறந்தநாளை முன்னிட்டு, ஏராளமான அதிமுக தொண்டர்கள் சேலம் நெடுஞ்சாலை நகர் பகுதியில் உள்ள அவரது இல்லத்தில் அவரை சந்தித்து தங்களுடைய பிறந்தநாள் வாழ்த்துகளைத் தெரிவித்தனர். 70 கிலோ கேக் வெட்டி கொண்டாடினார். அவருக்கு கட்சியினர் அவரது உயரத்திற்கு மாலை அணிவித்தனர்.

அந்த வகையில், அதிமுக ஐடி விங் சார்பில், அப்பிரிவின் செயலாளர் வி.வி.ஆர். ராஜ் சத்யன் தலைமையில் ஏராளமான தொண்டர்கள் எடப்பாடி பழனிசாமியின் 70வது பிறந்தநாளை குறிக்கும் வகையில் 70 வகை பழங்கள் கொண்ட சீர்வரிசையுடன் டிராக்டர் மற்றும் மாட்டுவண்டியில் பேரணியாகச் சென்று எடப்பாடி பழனிசாமியிடம் வழங்கி தங்கள் வாழ்த்துகளைத் தெரிவித்தனர். இந்நிகழ்வில் ஏராளமான ஐடி விங் நிர்வாகிகள் மற்றும் தொண்டர்கள் கலந்துகொண்டனர்.