சேலத்தில் பயங்கரம்: பிரபல ரவுடி கழுத்தை அறுத்து படுகொலை மற்றொரு ரவுடி வெறிச்செயல்

சேலம் ஜான்சன்பேட்டை பகுதியை சேர்ந்தவர் பரசுராமன் (வயது 27). பிரபல ரவுடியான இவர் மீது திருட்டு, வழிப்பறி, கஞ்சா விற்பனை உள்ளிட்ட வழக்குகள் பல்வேறு போலீஸ் நிலையங்களில் பதிவாகி உள்ளன. அவருடைய மனைவி மலர். இவர்களுக்கு சாய்லாராஸ்ரீ என்ற மகள் உள்ளார். கடந்த 2 மாதங்களுக்கு முன்பு வழிப்பறி வழக்கு ஒன்றில் பரசுராமனை அஸ்தம்பட்டி போலீசார் கைது செய்து சிறையில் அடைத்தனர். அவர் கடந்த மாதம் ஜாமீனில் வெளியே வந்தார். ஜான்சன்பேட்டை 2-வது கிழக்கு தெருவை சேர்ந்தவர் சின்னதம்பி (40). பிரபல ரவுடியான இவர் மீது கொலை, வழிப்பறி, சாராய விற்பனை உள்ளிட்ட 10-க்கும் மேற்பட்ட வழக்குகள் போலீஸ் நிலையங்களில் பதிவாகி நிலுவையில் உள்ளன. பரசுராமனும், சின்னதம்பியும் அடிக்கடி ஒன்றாக சேர்ந்து மது குடிப்பது வழக்கம். அதேபோல் நேற்று காலையும் அவர்கள் 2 பேரும் ஒன்றாக சேர்ந்து மது குடித்துவிட்டு சுற்றி திரிந்துள்ளனர். பிற்பகலில் சின்னதம்பியிடம், பரசுராமன் மீண்டும் மது குடிப்பதற்கு பணம் கொடு அல்லது மது வாங்கி கொடு என்று கேட்டுள்ளார்.

இதற்கு அவர் மறுத்துவிட்டு தனது வீட்டுக்கு வந்தார். ஆனால் பரசுராமன் விடாமல் பணம் கேட்டு சின்னதம்பி வீட்டுக்கே சென்றார். இதுதொடர்பாக அவர்களிடையே அங்கு திடீரென தகராறு ஏற்பட்டது. அப்போது ஆத்திரமடைந்த சின்னதம்பி அங்கு கிடந்த செங்கலை எடுத்து பரசுராமனை தாக்கினார். இதில் நிலைதடுமாறி அவர் ரோட்டில் கீழே விழுந்தார். பின்னர் சின்னதம்பி வீட்டில் இருந்த கத்தியை எடுத்து பரசுராமனின் கழுத்தை அறுத்தார். மேலும் அவரது முகத்தில் சில இடங்களில் கத்தியால் வெட்டினார். இதில் படுகாயம் அடைந்த பரசுராமன் சம்பவ இடத்திலேயே ரத்த வெள்ளத்தில் துடிதுடித்து பரிதாபமாக இறந்தார். இதை பார்த்து அந்த பகுதி மக்கள் அதிர்ச்சி அடைந்தனர். மேலும் பரசுராமன் உடலை பார்த்து உறவினர்கள் கதறி அழுதனர். தகவல் கிடைத்ததும் சம்பவ இடத்துக்கு போலீஸ் உதவி கமிஷனர் நிலவழகன், இன்ஸ்பெக்டர்கள் கணேசன், செல்வராஜ் மற்றும் போலீசார் அங்கு விரைந்து சென்றனர்.

பின்னர் கொலையுண்ட பரசுராமனின் உடலை போலீசார் மீட்டு பிரேத பரிசோதனைக்காக சேலம் அரசு ஆஸ்பத்திரிக்கு அனுப்பி வைத்தனர். தொடர்ந்து இந்த கொலை தொடர்பாக அக்கம் பக்கத்தில் உள்ளவர்களிடம் விசாரித்தனர். கொலை நடந்த இடத்துக்கு தடயவியல் மற்றும் கைரேகை நிபுணர்கள் வந்து தடயங்களை சேகரித்தனர்.இதனிடையே அந்த பகுதியில் சுற்றி திரிந்த சின்னதம்பியை போலீசார் கைது செய்து போலீஸ் நிலையத்துக்கு அழைத்து சென்று விசாரித்து வருகின்றனர். மேலும் கொலை நடந்த இடத்தில் பொருத்தப்பட்டிருக்கும் கண்காணிப்பு கேமராவில் பதிவான காட்சிகளை போலீசார் ஆய்வு செய்து வருகின்றனர். சேலத்தில் பிரபல ரவுடியை கழுத்தை அறுத்து படுகொலை செய்த சம்பவம் அந்த பகுதியில் பரபரப்பை ஏற்படுத்தியது.