கால் தவறி கிணற்றில் விழுந்த மூதாட்டி சாவு

ராணிப்பேட்டை மாவட்டம், ஆற்காட்டை அடுத்த அத்திதாங்கல் கிராமத்தைச் சேர்ந்தவர் வனஜா (76). இவர், கடந்த சில நாட்களுக்கு முன்பு வீட்டை விட்டு வெளியே சென்றவர் மீண்டும் வீடு திரும்பவில்லை. பல்வேறு இடங்களில் தேடியும் கிடைக்கவில்லை. இதுகுறித்து ஆற்காடு தாலுகா போலீசில் புகார் செய்யப்பட்டது. போலீசார் வனஜாவை தேடி வந்தனர்.நேற்று காலை அதே பகுதியில் உள்ள ஒரு தனியாருக்கு சொந்தமான விவசாயக் கிணற்றில் துர்நாற்றம் வீசுவதாக அப்பகுதி மக்கள் ஆற்காடு தாலுகா போலீசாருக்கு தகவல் தெரிவித்தனர்.

போலீசார் விரைந்து சென்று கிணற்றில் கிடந்த பெண்ணின் பிணத்தை மீட்டு விசாரித்தனர். உடலை பிரேதப் பரிசோதனைக்காக ஆற்காடு அரசு மருத்துவமனைக்கு அனுப்பி வைத்தனர்.பிணமாக கிடந்தவர் காணாமல் போன வனஜா என்பது விசாரணையில் தெரிய வந்தது. இவர் அந்த வழியாக செல்லும்போது கால் தவறி கிணற்றில் விழுந்திருக்கலாம் என போலீசார் சந்தேகிக்கின்றனர். மேலும் வழக்குப்பதிவு செய்து விசாரணை நடத்தி வருகின்றனர்.