பாதிரியார் வீட்டில் திருடியவர் கைது - 24 மணி நேரத்தில் நடவடிக்கை

புதுக்கோட்டை கணேஷ்நகர் முதல் வீதியில் வசித்து வருபவர் ஜான் தேவசகாயம் (56). இவர், மாலையீட்டிலுள்ள தேவாலயத்தில் பாதிரியாராக உள்ளார். கடந்த 22-ஆம் தேதி இவர் குடும்பத்துடன் கோவைக்குச் சென்றுவிட்டு, மே 28-ஆம் தேதி வீடு திரும்பினார்.அப்போது வீட்டின் பூட்டு உடைக்கப்பட்டு, உள்ளே இருந்த நகைகள் திருடப்பட்டிருந்தன.இதைத் தொடர்ந்து, மாவட்டக் காவல் கண்காணிப்பாளர் வந்திதா பாண்டே, தனிப்படை அமைத்து குற்றவாளியைப் பிடிக்க உத்தரவிட்டார்.

இந்த நிலையில் பாதிரியாரின் வீட்டிலிருந்து சேகரிக்கப்பட்ட கைரேகைகள், வழக்கமான நகைத் திருட்டு குற்றவாளிகளின் கைரேகைகளுடன் ஒப்பிட்டுப் பார்க்கப்பட்டன. அப்போது, மதுரை திருமங்கலம் அருகேயுள்ள குத்தியார்குண்டு இலங்கைத் தமிழர் மறுவாழ்வு முகாமைச் சேர்ந்த இலங்கைத் தமிழர் கேதீஸ்வரன் (34) என்பவரின் கைரேகையுடன் ஒத்துப்போனது.

இதைத் தொடர்ந்து அங்கு விரைந்த தனிப்படையினர், கேதீஸ்வரனை புதன்கிழமை கைது செய்தனர். அவரிடமிருந்து, ரூ. 14.45 லட்சம் மதிப்புள்ள 36 பவுன் தங்க நகைகளையும், ஒரு லட்சம் மதிப்புள்ள வைர நெக்லஸையும் பறிமுதல் செய்தனர். 24 மணி நேரத்தில் குற்றவாளியைக் கைது செய்து நகைகளைப் பறிமுதல் செய்த தனிப்படையினரை மாவட்டக் காவல் கண்காணிப்பாளர் வந்திதா பாண்டே நேரில் அழைத்துப் பாராட்டினார்.