கள்ளச்சாராயத்திற்கு இருக்கும் முக்கியத்துவம் குடிநீரில் இல்லையா ? பிரேமலதா விஜயகாந்த் கண்டனம் !

சென்னை பல்லாவரத்தில் 2 பேர் உடல் நலக்குறைவால் உயிரிழந்ததற்கு அரசின் அலட்சியமே காரணம்  என தேமுதிக பொதுச்செயலாளர் பிரேமலதா விஜயகாந்த் தெரிவித்துள்ளார். மேலும் உயிரிழந்தவர்களின் குடும்பங்களுக்கு தலா 10 லட்சம் ரூபாய் வழங்க வேண்டும் என்றும் பிரேமலதா விஜயகாந்த் வலியுறுத்தியுள்ளார்.

சென்னை பல்லாவரத்தில் குடிநீரில் கழிவுநீர் கலந்ததால் உடல் நலக்குறைவு ஏற்பட்டு 2 பேர் உயிரிழந்தனர். 30 பேர் குரோம்பேட்டை அரசு மருத்துவமனையில் சிகிச்சை பெற்று வருகின்றனர். சிகிச்சை பெற்று வருபவர்களை தேமுதிக பொதுச் செயலாளர் பிரேமலதா விஜயகாந்த் நேரில் சந்தித்து நலம் விசாரித்தார்.

இதனை தொடர்ந்து செய்தியாளர்களை சந்தித்தார் பிரேமலதா விஜயகாந்த், அப்போது பேசிய அவர், "குடிநீரில் கழிவுநீர் கலந்ததை உடனடியாக சரி செய்து மக்களை அரசு காப்பாற்றி இருக்க வேண்டும். ஆனால் அப்படி ஒன்று நடக்கவே இல்லை என மக்கள் மீது பழி போடுகிறது அரசு. இந்த சம்பவம் இந்த அரசு 100 சதவீதம் தோல்வி அடைந்த அரசு என்பதை நிரூபிக்கிறது. தாம்பரம் பகுதி சாலைகள் படுமோசமாக உள்ளது. சாலைகள் போன்று இல்லை, மலை பாதையை போன்று உள்ளன.

மைதா மாவை தூவி விட்டு ப்ளீச்சிங் பவுடர் போட்டதாக கூறுகிறார்கள். எதற்காக இப்படி செய்கிறார்கள் என்பது புரியவில்லை. இந்த அரசாங்கம் குடிநீருக்காக ஆரோ அமைத்து கொடுத்தால் என்ன? இந்த அரசாங்கத்திடம் என்ன இல்லை? மக்களிடம் இருந்து எவ்வளவு வரி வசூலிக்கிறார்கள்? கழிவு நீர் கலந்ததால் எத்தனை பேர் பாதிக்கப்பட்ட உள்ளார்கள். மக்கள் மிகவும் பயந்து போய் உள்ளார்கள்.

இனி இது போன்ற சம்பவங்கள் நடக்காமல் அரசு தடுக்க வேண்டுமே தவிர அப்படி ஒரு சம்பவமே நடக்கவில்லை என அமைச்சர் தமோ அன்பரசன் கூறியிருப்பது கண்டனத்திற்குரிய விஷயம். மக்கள் பாதிக்கப்பட்டுள்ளார்கள். அதற்கு பதில் சொல்லாமல் இப்படி பொய் சொல்லிக் கொண்டிருக்க கூடாது. இதுவரை இறந்தவர்களுக்கு நிவாரணம் ஏதும் வழங்கவில்லை. உடனடியாக உயிரிழந்தவர்களின் குடும்பங்களுக்கு 10 லட்சம் ரூபாய் நிவாரணம் வழங்க வேண்டும்.

பாதிக்கப்பட்டவர்களுக்கு ஐந்து லட்சம் ரூபாய் நிவாரணம் வழங்க வேண்டும். 

கள்ளச்சாராயம் குடித்து இறந்தவர்களுக்கு 10 லட்சம் ரூபாய் கொடுத்த இந்த அரசாங்கம் அரசின் அவலத்தால் குடிநீரில் கழிவுநீர் கலந்துள்ள நிலையில் அவர்களுக்கு 10 லட்சம் ரூபாய் கொடுக்க வேண்டும். அரசின் கவன குறைவுதான் இதற்கு காரணம். சென்னை பட்டினப்பாக்கத்தில் குடிசை மாற்று வாரியத்தில் கட்டப்பட்டுள்ள குடியிருப்புகளில் மேற்கூரை இடிந்து விழுந்து இளைஞர் ஒருவர் மரணம் அடைந்துள்ளார்.

மக்கள் சாலை மறியலில் ஈடுபட்டதும் உடனே 5 லட்சம் ரூபாய் அறிவிக்கிறார்கள். அரசாங்கம் என்பது அனைவருக்கும் பாதுகாப்பு அளிப்பதாக இருக்க வேண்டும். ஆனால் இந்த அரசாங்கத்தால் யாருக்கும் பாதுகாப்பு இல்லை. திருவண்ணாமலையில் மூன்று மாதங்களுக்கு முன்பு அமைத்த பாலம் இன்று இல்லை. எந்த அளவுக்கு இந்த ஆட்சியில் ஊழல் நடைபெறுகிறது என்பதற்கு இந்த பாலம் தான் உதாரணம்.

ரிஷிவந்தம் தொகுதி மணலூர்பேட்டையில் 2011ல் கேப்டன் விஜயகாந்த் ஒரு காலத்தை கட்டினார். இன்று அங்கும் வெள்ளம் ஏற்பட்டுள்ளது. ஆனால் அந்த பாலம் இன்றும் தரமான பாலமாக உள்ளது. மக்களுக்காக கட்டும் பாலம், மக்களுக்காக கொடுக்கும் உணவு, மருந்து மற்றும் ப்ளீச்சிங் பவுடர்களில் கூட ஊழல் நடக்கிறது. கேள்வி கேட்கும் எதிர்க்கட்சிகளை வேறு வேலை இல்லை, அவர்களுக்கு பதில் சொல்ல வேண்டிய அவசியம் இல்லை, என்று முதலமைச்சரோ அல்ல அமைச்சர்களோ பேசுவது தவறானது.

நீங்கள் செய்யும் தவறுகளை எதிர்கட்சிகளாகிய நாங்கள் சுட்டிக் காட்டுகிறோம். முழு பூசணிக்காயை சோற்றில் மறைக்க வேண்டாம். 2026 இல் மக்கள் இதற்கு சரியான பாடம் புகட்டுவார்கள். டிசம்பர் மாதம் வந்தால் மழை பெய்யும் வெள்ளம் ஏற்படும் என்று எல்லோருக்கும் தெரியும். முதல்வர் அனைத்து நடவடிக்கைகளும் எடுக்கப்பட்டு விட்டதாக தெரிவித்தார். ஆனால் ஒரு நடவடிக்கையும் எடுக்கவில்லை. இரவோடு இரவாக சாத்தனூர் அணையை திறந்து விட்டு கடலூர் மாவட்டத்தை வெள்ளத்தில் மூழ்கடித்துள்ளார்கள்.

செம்பரம்பாக்கம் ஏரி திறக்கப்பட்டபோது எத்தனை கூப்பாடு போட்டார்கள்? முதல்வர் ஸ்டாலின், துணை முதல்வர் மற்றம் அமைச்சர் துரைமுருகன் ஆகியோர் இதற்கு என்ன பதில் சொல்லப் போகிறார்கள்? முன்னறிவிப்பு இல்லாமல் எதற்காக அணையை திறக்க வேண்டும் ? இவ்வாறு பிரேமலதா விஜயகாந்த் சரமாரியாக விளாசியுள்ளார்.