கண் தானம் குறித்த விழிப்புணர்வு பேரணி

லயன்ஸ் சங்கங்கள் சார்பில், "பார்வைக்கு ஒரு பயணம்" விழிப்புணர்வு பேரணி நடைபெற்றது. கரூர் லயன்ஸ் சங்கம் சார்பில், கண்தானம் பற்றி தெளிவான மருத்துவ விளக்கங்களை பொதுமக்களிடையே தெரிவித்து, விழிப்புணர்வை ஏற்படுத்தும் வகையில், தேசிய கண்தான இரு வார விழா நடைபெற்று வருகிறது. அதன் ஒரு பகுதியாக பன்னாட்டு லயன்ஸ் சங்கங்கள் இணைந்து பொதுமக்களிடையே கண் தானத்தை பற்றிய விழிப்புணர்வை ஏற்படுத்தும் நோக்கில், "பார்வைக்கு ஒரு பயணம்"என்ற தலைப்பில், பள்ளி, கல்லூரி மாணவ- மாணவிகள் பங்கேற்ற கண்தான விழிப்புணர்வு பேரணி, கரூர் செங்குந்தபுரத்தில் உள்ள மார்னிங்ஸ்டார் பள்ளியில் இருந்து துவங்கியது. இந்த விழிப்புணர்வு பேரணி செங்குந்தபுரம், கோவை சாலை, பேருந்து நிலையம் வழியாக உழவர் சந்தை வந்து, அங்கிருந்து நாரதகண சபாவில் முடிவுற்றது. இந்தப் பேரணியில் பங்கேற்ற மாணவ- மாணவிகள், கைகளில் கண் தானத்தை வலியுறுத்தும் விழிப்புணர்வு பதாகைகளை ஏந்தி விழிப்புணர்வு வாசகங்களை கூறியபடி விழிப்புணர்வை ஏற்படுத்தி சென்றனர்.