பருத்திக் குவிண்டால் ரூ.7,432 விற்பனை - விவசாயிகள் மகிழ்ச்சி

மயிலாடுதுறை மாவட்டம் மயிலாடுதுறையில் உள்ள ஒழுங்குமுறை விற்பனைக் கூடத்தில் பருத்தி மறைமுக ஏலம் நேற்று தொடங்கியது. இந்த மறைமுக ஏலத்தில் பருத்தி குவிண்டால் ஒன்றுக்கு அதிகபட்ச விலையாக ரூ.7,432-க்கும், குறைந்தபட்ச விலையாக ரூ.6,669-க்கும் சராசரியாக ரூ.7,020-க்கும் விலைபோனது. ஒரேநாளில் மொத்தமாக 1,400 குவிண்டால் பருத்தி ரூ.1 கோடிக்கு கொள்முதல் பரிவர்த்தனை நடைபெற்றது.

இந்த ஏலத்தில் 350 விவசாயிகள் கொண்டுவந்த பருத்தியை தஞ்சாவூர், மயிலாடுதுறை, திருப்பூர், தேனி, கரூர், விழுப்புரம், பன்ருட்டி உள்ளிட்ட ஊர்கள் மற்றும் ஆந்திர மாநிலத்தில்; இருந்து வந்த வியாபாரிகள், மில் அதிபர்கள் கொள்முதல் செய்தனர். குறைந்தபட்ச ஆதாரவிலையை விட கூடுதல் விலைக்கு பருத்தி கொள்முதல் செய்யப்பட்டதால் விவசாயிகள் மகிழ்ச்சி அடைந்தனர்.