தொடர் மழையால் பள்ளி,கல்லூரிகளுக்கு விடுமுறை

மயிலாடுதுறை மாவட்டத்தில் மயிலாடுதுறை மணல்மேடு குத்தாலம் மங்கைநல்லூர் செம்பனார்கோயில் தரங்கம்பாடி திருக்கடையூர் மற்றும் சீர்காழி பகுதிகளில் விடிய விடிய தொடர்ந்து பலத்த மழை பெய்து வந்தது. இன்று காலை 6 மணி வரை பெய்த மழை அளவு மயிலாடுதுறை மணல்மேடு பகுதியில் தலா 10 செ.மீ., சீர்காழியில் 22 செ.மீ., கொள்ளிடத்தில் 18 செ.மீ., தரங்கம்பாடியில் 8 செ.மீ.,செம்பார்கோவில் 4 செ.மீ., என மழை பதிவாகியுள்ளது. சராசரியாக மயிலாடுதுறை மாவட்டத்தில் 12 செ.மீ., மழை பதிவாகி உள்ளது. மயிலாடுதுறை மாவட்டத்தில் சம்பா தாளடி நெற்பயிர் அறுவடை துவங்கிய நிலையில் இந்த மழை, விளைந்த பயிர்களை வயலில் சாய்த்து உள்ளது. இரவில் ஒரே நேரத்தில் இல்லாமல் தொடர்ந்து காலை 6மணி வரை மழை பெய்து வந்ததால் நகரப் பகுதிகளில் மற்றும் பள்ளமான பகுதிகளில் மழை நீர் தேங்கவில்லை, மேலும் மழை தொடர்ந்தால் விவசாயிகளுக்கு பாதிப்பை ஏற்படுத்தும் என கவலையில் ஆழ்ந்துள்ளனர்.