டூவீலர் திருடியவர் தாக்கி கொலை - 2 பேர் கைது, 3 பேர் தலைமறைவு

கரூர் மாவட்டம், மண்மங்கலம் தாலுக்கா, வாங்கல் கிராம நிர்வாக அலுவலராக பணியாற்றி வருபவர் பூர்ணிமா வயது 37. ஜூன் 23ஆம் தேதி வாங்கல் பரிசல்துறை அருகே விநாயகர் கோவில் பின்புறம் 30 லிருந்து 35 வயது மதிக்கத்தக்க அடையாளம் தெரியாத ஆண் உடல் கிடப்பதாக அப்பகுதி பொதுமக்கள் அளித்த தகவலின் பேரில், சம்பவ இடத்திற்கு சென்று பார்வையிட்டார் பூர்ணிமா. அங்கு அடையாளம் தெரியாத ஆண் உடல் இருப்பதை பார்த்து உறுதி செய்த பிறகு, வாங்கல் காவல் துறையினருக்கு புகார் அளித்தார்.

புகாரின் அடிப்படையில் சம்பவ இடத்திற்கு சென்று விசாரணை மேற்கொண்டபோது, வாங்கல் ஈ வி ஆர் தெருவை சேர்ந்த மோகன் மகன் வினோத்குமார் வயது 30 என்பவரது டூவீலரை,இறந்த அடையாளம் தெரியாத நபர் எடுத்துக் கொண்டு தப்பிச் சென்றதாக கூறப்படுகிறது. அப்போது வினோத்குமார் அவருடைய நண்பர்களான கதிர்வேல், பாலாஜி, கருவாடு என்கிற முத்து, கரண்ராஜ் ஆகிய நான்கு பேருடன் அந்த அடையாளம் தெரியாத நபரை விரட்டி சென்று பிடித்து, குச்சியால் தாக்கியதாகவும் கூறப்படுகிறது. இந்த சம்பவத்திற்கு பிறகு அடையாளம் தெரியாத நபர் உயிரிழந்ததாகவும் கூறப்படுகிறது.

எனவே, இந்த சம்பவத்தில் ஈடுபட்ட வினோத்குமார் மற்றும் கதிர்வேல் ஆகிய இருவரையும் காவல்துறையினர் விசாரணைக்கு அழைத்துச் சென்றுள்ளனர். மற்ற மூன்று பேரும் தலைமறைவாக உள்ளதாக கூறப்படுகிறது. இது தொடர்பாக விஏஓ அளித்த புகாரின் பேரில் வழக்கு பதிவு செய்து விசாரணை மேற்கொண்டு வருகின்றனர் வாங்கல் காவல்துறையினர்.