சேலம் சூரமங்கலம் அடுத்த போடிநாயக்கன்பட்டி பகுதியில் உள்ள ஒரு விவசாய கிணற்றில் 50 வயது மதிக்கத்தக்க ஆண் ஒருவர் நேற்று இறந்து கிடந்தார். இதனை பார்த்த அப்பகுதி பொதுமக்கள் சூரமங்கலம் போலீஸ் நிலையத்துக்கு தகவல் தெரிவித்தனர். மேலும் சூரமங்கலம் தீயணைப்பு நிலையத்திற்கும் தகவல் கொடுக்கப்பட்டது. இதனை தொடர்ந்து தீயணைப்பு துறை வீரர்கள் மற்றும் போலீசார் சம்பவ இடத்திற்கு விரைந்து சென்றனர். தீயணைப்பு துறை வீரர்கள் கிணற்றில் கிடந்த உடலை மீட்டு மேலே கொண்டு வந்தனர். இதையடுத்து போலீசார் ஆணின் உடலை கைப்பற்றி பிரேத பரிசோதனைக்காக சேலம் அரசு ஆஸ்பத்திரிக்கு அனுப்பி வைத்தனர். இந்த சம்பவம் குறித்து சூரமங்கலம் போலீசார் வழக்குப்பதிவு செய்து இறந்தவர் யார்? அவர் கிணற்றில் விழுந்து தற்கொலை செய்து கொண்டாரா? அல்லது கொலை செய்யப்பட்டு உடல் கிணற்றில் வீசப்பட்டதா? என பல்வேறு கோணங்களில் விசாரணை நடத்தி வருகின்றனர்.