உசிலம்பட்டியில் இயக்குனர் மணிகண்டன் வீட்டில் திருட்டு

உசிலம்பட்டியில் காக்கா முட்டை திரைப்படம் இயக்குனர் மணிகண்டன் வீட்டில் திருட்டு. போலீசார் விசாரணை. மதுரை மாவட்டம் உசிலம்பட்டி தேனி ரோட்டில் அமைந்துள்ள எழில் நகரில் காக்கா முட்டை திரைப்பட இயக்குனர் மணிகண்டன் வீடு அமைந்துள்ளது.

இந்நிலையில் நேற்று இரவு மணிகண்டன் வீட்டை பூட்டிவிட்டு சென்னை சென்ற நிலையில் இன்று அங்கு பணிபுரியும் பணியாட்கள் சென்று பார்த்தபோது வீட்டின் கதவு உடைக்கப்பட்டு வீட்டின் பீரோவும் உடைக்கப்பட்டு இருந்தது கண்டு அதிர்ச்சி அடைந்தனர். அதனைத் தொடர்ந்து இயக்குனர் மணிகண்டனிடம் தொடர்பு கொண்டு தகவல் தெரிவித்தனர்.

அதனைத் தொடர்ந்து உசிலம்பட்டி நகர் காவல் நிலையத்தில் இயக்குனர் மணிகண்டன் தொலைபேசி மூலமாக புகார் அளித்தார் .புகாரின் அடிப்படையில் போலீசார் அங்கு சென்று சோதனை செய்தபோது வீட்டின் பீரோ உடைக்கப்பட்டு பீரோவில் வைக்கப்பட்டிருந்த ரொக்கம் ரூ.1லட்சம் பணம் மற்றும் ஐந்து பவுன் தங்க நகை திருடு போனது தெரியவந்தது. இது குறித்து போலீசார் வழக்கு பதிவு செய்து விசாரணை மேற்கொண்டு வருகின்றனர்.

உசிலம்பட்டி பகுதிகளில் வீட்டின் பூட்டை உடைத்து அவ்வப்போது பணம் நகை திருடு போவது பொது மக்களிடையே பெரும் அச்சத்தை ஏற்படுத்தி உள்ளது.