மாவட்ட ஆட்சியர் அலுவலகத்தில் தற்கொலைக்கு முயன்றவரால் பரபரப்பு

ராணிப்பேட்டை மாவட்டம், ஆற்காடு பகுதியை சேர்ந்தவர் சதீஷ்குமார் வயது (45) இவருக்கு 16 ஆண்டுகளுக்கு முன்பு சாமுண்டீஸ்வரி என்பவருடன் திருமணம் நடைபெற்றுள்ளது. இந்த நிலையில் சாமுண்டீஸ்வரிக்கும் சதீஷ்குமாருக்கும் இடையே கருத்து வேறுபாடு ஏற்பட்டதால் இருவரும் பிரிந்து வாழ்ந்து வருகின்றனர். மேலும் இருவருக்கான விவாகரத்து வழக்கு நீதிமன்றத்தில் நிலுவையில் உள்ளது.

இந்த நிலையில் ஆற்காடு பகுதியை சேர்ந்த சிலம்பரசன் என்பவர் தனது மனைவியை தன்னிடம் இருந்து பிரித்து விட்டதாக கூறி பலமுறை சதீஷ்குமார் ஆற்காடு நகர காவல் நிலையத்தில் புகார் அளித்ததாக கூறப்படுகிறது.. இந்த நிலையில் அந்த புகார் மீது போலீசார் எவ்விதமான நடவடிக்கை எடுக்காததை கண்டித்து மாவட்ட ஆட்சியர் அலுவலகத்தில் இன்று நடைபெற்ற மக்கள் குறை தீர்வு நாள் கூட்டத்தில் உள்ளே வந்த சதீஷ்குமார் தான் மறைத்து வைத்திருந்த பெட்ரோல் கேனை திடீரென்று பொதுமக்கள் முன்னிலையில் தன் மீது பெட்ரோலை ஊற்றிக் கொண்டு துப்பாக்கி வடிவிலான இருந்த லைட்டரைக் கொண்டு தற்கொலைக்கு முயன்றுள்ளார்.

இதைக் கண்ட மனு அளிக்க வந்த பெண்கள் அங்கிருந்து தலைதரிக்க ஓடினர். உடனடியாக தகவல் பெற்று விரைந்து வந்த போலீசார் பெட்ரோல் கேனுடன் இருந்த சதீஷ்குமாரிடம் பேச்சுவார்த்தையில் ஈடுபட்டு அவர் மீது தண்ணீரை ஊற்றி விசாரணைக்காக சிப்காட் காவல் நிலையத்திற்கு அழைத்துச் சென்றனர். இந்த சம்பவம் காரணமாக ஆட்சியர் அலுவலக வளாகத்தில் பெரும் பரபரப்பு ஏற்பட்டது.