சென்னை விமான நிலையத்தில் எந்தவித முன்னறிவிப்பும் இல்லாமல் திடீரென 12 விமானங்கள் ரத்து!!

சென்னை விமான நிலையத்தில் எந்தவித முன் அறிவிப்பும் இல்லாமல் திடீரென 12 விமானங்கள் ரத்து செய்யப்பட்டதால் பயணிகள் அவதிக்கு உள்ளாகினர். சென்னை விமான நிலையத்தில் கடந்த சில நாட்களாக விமான சேவைகள் திடீர் திடீரென ரத்து செய்யப்பட்டு வருகின்றன. நிர்வாக காரணங்களுக்காக விமானங்கள் ரத்து செய்யப்படுவதாக அறிவிக்கப்படுவதால் பயணிகள் தொடர்ந்து அவதிக்கு உள்ளாகி வருகின்றனர். அந்த வகையில், இன்று ஒரே நாளில் புவனேஸ்வர், கொல்கத்தா, பெங்களூரு, திருவனந்தபுரம், சிலிகுரி 6 புறப்பாடு விமானங்கள் 6 வருகை விமானங்கள் என மொத்தம் 12 விமானங்கள் ரத்து செய்யப்பட்டுள்ளன. இந்த விமானங்கள் அனைத்தும் ஏர் இந்தியா எக்ஸ்பிரஸ் விமான நிறுவனத்தை சேர்ந்ததாகும். நிர்வாக காரணங்களால் இந்த விமானங்கள் ரத்து செய்யப்பட்டுள்ளதாக அறிவிக்கப்பட்டுள்ளது. ரத்து செய்யப்பட்ட விமானங்களின் விவரங்கள்: புவனேஸ்வருக்கு காலை 7.45 மணிக்கு செல்ல வேண்டிய விமானம், காலை 8.25 மணிக்கு கொல்கத்தா செல்லும் விமானம் ரத்து, காலை 9.40 மணி பெங்களூரு விமானம், காலை 10.10 மணி திருவனந்தபுரம் செல்லும் விமானம் ரத்து, பகல் 12.35 மணி சிலிகுரி செல்லும் விமானம், இரவு 10.45 மணி கொல்கத்தா புறப்படும் விமானம் ரத்து, சென்னைக்கு காலை 9 மணிக்கு வர வேண்டிய பெங்களூரு விமானம், பகல் 12 மணி புவனேஸ்வர் விமானம் ரத்து, சென்னைக்கு பகல் 1.40 மணிக்கு வர வேண்டிய திருவனந்தபுரம் விமானம் ரத்து, சென்னைக்கு பகல் 1.45 மணிக்கு வர வேண்டிய கொல்கத்தா விமானம், மாலை 6.40 மணி சிலிகுரி விமானம் ரத்து, சென்னைக்கு இரவு 10.05 மணிக்கு வர வேண்டிய கொல்கத்தா விமானம் ரத்து செய்யப்பட்டுள்ளது.