பென்னாகரம் அருகே 40 வயது மதிக்கத்தக்க ஆண் யானை பலி

தர்மபுரி மாவட்டம் பென்னாகரம் வனப்பகுதிக்குட்பட்ட பெவனூர் காப்புக் காடுகள் பகுதியில் ஒற்றை யானை உடல்நிலை சரியில்லாமல் இருந்து வந்தது. இதனைக் கண்ட பென்னாகரம் வனத்துறையினர் தர்மபுரி மாவட்ட வன அலுவலருக்கு தகவல் தெரிவித்தனர். தகவலின் பேரில் சம்பவ இடத்திற்கு வந்த மாவட்ட வன அலுவலர், உதவி கால்நடை மருத்துவர் பிரகாஷ், பென்னாகரம் வனச்சரக அலுவலர் செந்தில்குமார், ஒகேனக்கல் வனச்சரக அலுவலர் ராஜ்குமார் ஆகியோர் வனப்பகுதியில் இருந்த யானைக்கு சிகிச்சை அளித்தனர். சிகிச்சை அளிக்கப்பட்ட ஒற்றை யானை திடீரென உயிரிழந்தது. இது குறித்து வனத்துறையினர் கூறுகையில் வனப்பகுதியில் உடல் நிலை பாதிப்புக்கு உள்ளாகி 40 வயது மதிக்கத்தக்க ஆண் யானை இறந்துள்ளதாகவும், இறந்த யானை பிரேத பரிசோதனை செய்து வனப்பகுதியில் புதைக்கப்பட்டுள்ளதாக தெரிவித்தனர்.