லாரி மீது இருசக்கர வாகனம் மோதி விபத்து - வாலிபர் பலி

காஞ்சீபுரம் மாவட்டம், தாமல் மேல்மாந்தாங்கல் பகுதியைச் சேர்ந்தவர் மஞ்சுநாதன் (23), பேண்ட் வாத்திய கலைஞர். இவருக்கு திருமணமாகி 2 வயதில் ஒரு குழந்தை உள்ளது. ராணிப்பேட்டை மாவட்டம் மாந்தாங்கல் பகுதியில் உறவினர் இல்ல சுபநிகழ்ச்சியில் பங்கேற்பதற்காக அவர் தனது வீட்டில் இருந்து மோட்டார்சைக்கிளில் புறப்பட்டு முதலில் தனது மாமியார் வீட்டுக்கு வந்தார்.

பின்னர் உறவினர் இல்ல சுப நிகழ்ச்சியில் பங்கேற்று விட்டு இரவு அங்கிருந்து புறப்பட்டு தாமலை நோக்கி சென்னை-பெங்களூரு தேசிய நெடுஞ்சாலையில் சென்று கொண்டிருந்தார். காவேரிப்பாக்கத்தை அடுத்த சுமைதாங்கி அருகே செல்லும்போது, திடீரெனக் கட்டுப்பாட்டை இழந்த அவரின் டூ வீலர் முன்னால் சென்று கொண்டிருந்த ஒரு கன்டெய்னர் லாரியின் பின்பக்கம் மோதி விபத்துக்குள்ளானது. அதில் தூக்கி வீசப்பட்ட மஞ்சுநாதன் பலத்த காயம் அடைந்தார்.

அங்கிருந்த மக்கள் படுகாயம் அடைந்த மஞ்சுநாதனை மீட்டு வாலாஜா அரசு மருத்துவமனைக்கு அனுப்பி வைத்தனர். அங்கு அவருக்கு முதலுதவி அளித்து, மேல் சிகிச்சைக்காக சென்னை ராஜீவ்காந்தி அரசு மருத்துவமனையில் அனுமதித்தனர்.அங்கு சிகிச்சை பலனின்றி மஞ்சுநாதன் பரிதாபமாக உயிரிழந்தார்.இதுகுறித்து காவேரிப்பாக்கம் காவல் நிலைய போலீசார் வழக்குப்பதிவு செய்து விசாரணை நடத்தி வருகின்றனர்.