சித்ரா பவுர்ணமி: திருவண்ணாமலைக்கு 280 சிறப்பு பஸ்கள் இயக்கம்!

சித்ரா பவுர்ணமி நாளை (செவ்வாய்க்கிழமை) அதிகாலை 4.16 மணிக்கு தொடங்கி நாளை மறுதினம் (புதன்கிழமை) அதிகாலை 5.47 மணிக்கு நிறைவடைகிறது. இதையொட்டி திருவண்ணாமலைக்கு செல்லும் பக்தர்களின் வசதிக்காக பல்வேறு பகுதிகளில் இருந்து சிறப்பு பஸ்கள் இயக்க தமிழக அரசு நடவடிக்கை எடுத்துள்ளது. அதன்படி வேலூர் மண்டல அரசு போக்குவரத்துக்கழகம் சார்பில் வேலூரில் இருந்து 140 பஸ்கள், திருப்பத்தூரில் இருந்து 60 பஸ்கள், சென்னையில் இருந்து 45 பஸ்கள், ஆற்காட்டில் இருந்து 35 பஸ்கள் என்று மொத்தம் 280 சிறப்பு பஸ்கள் திருவண்ணாமலைக்கு இயக்கப்படுகிறது. இந்த பஸ்கள் திங்கட்கிழமை (22.04.2024) மாலை அந்தந்த பகுதிகளில் இருந்து இயக்க நடவடிக்கை எடுக்கப்பட்டுள்ளது. பக்தர்களின் எண்ணிக்கையை பொறுத்து கூடுதலாக திருவண்ணாமலைக்கு சிறப்பு பஸ்கள் இயக்கப்படும் என்று போக்குவரத்துக்கழக அதிகாரிகள் தெரிவித்தனர்.