பிளஸ்-2 தற்காலிக மதிப்பெண் சான்றிதழ் வினியோகம் தொடக்கம்

தமிழகத்தில் பிளஸ்-2 தேர்வு முடிவுகள் கடந்த 6-ந் தேதி வெளியிடப்பட்டன. தூத்துக்குடி மாவட்டத்தில் இந்த ஆண்டு 18 ஆயிரத்து 578 மாணவ, மாணவிகள் பிளஸ்-2 தேர்வு எழுதினர். இதில் 17 ஆயிரத்து 908 மாணவ, மாணவிகள் தேர்ச்சி பெற்றனர். இது 96.39 சதவீத தேர்ச்சி ஆகும். பிளஸ்-2 தேர்வு முடிவுகள் வெளியானதை தொடர்ந்து கல்லூரிகளில் மாணவர்கள் சேர்க்கைக்கான விண்ணப்ப பதிவு தொடங்கப்பட்டு உள்ளது. இதில் மாணவ, மாணவிகள் தங்கள் விண்ணப்பங்களை பதிவு செய்ய வதியாக பிளஸ்-2 தேர்ச்சி பெற்ற மாணவர்களுக்கு தற்காலிக மதிப்பெண் சான்றிதழ் அந்தந்த பள்ளிக்கூடங்கள் மூலம் வழங்கப்படும் என்று தமிழக பள்ளிக் கல்வித்துறை அறிவித்து இருந்தது. இதனை தொடர்ந்து பள்ளிகளில் தற்காலிக மதிப்பெண் சான்றிதழை பதிவிறக்கம் செய்தனர். நேற்று முதல் மாணவ, மாணவிகளுக்கு தற்காலிக மதிப்பெண் சான்றிதழ் வினியோகம் தொடங்கியது. இதனை தொடர்ந்து மாணவ, மாணவிகள் தாங்கள் பயின்ற பள்ளிகளுக்கு சென்று தற்காலிக மதிப்பெண் சான்றிதழ்களை ஆர்வமுடன் வாங்கிச் சென்றனர். மாணவர்களுக்கான அசல் மதிப்பெண் சான்றிதழ் விரைவில் வழங்கப்படும் என்று அதிகாரிகள் தெரிவித்தனர்.