லாரி மோதி கூலித்தொழிலாளி பலி

வேலூர் மாவட்டம், பள்ளிகொண்டாவை அடுத்த வசந்தநடை கிராமத்தைச் சேர்ந்தவர் வெங்கடேசன் (55). இவர் ஆம்பூர் பகுதியில் உள்ள தனியார் தொழிற்சாலையில் வேலை செய்து வந்தார். நேற்று காலை இவர் மோட்டார் சைக்கிளில் வேலைக்கு சென்று கொண்டிருந்தார். அகரம்சேரி அருகே தேசிய நெடுஞ்சாலையில் சென்று கொண்டிருந்தபோது சென்னையில் இருந்து பெங்களூரு நோக்கி சென்ற ஒரு லாரி இவரது மோட்டார் சைக்கிள் மீது மோதியது.

இந்த விபத்தில் இடுப்பு பகுதி முழுவதும் நசுங்கிய நிலையில் சம்பவ இடத்திலேயே வெங்கடேசன் பலியானார். தகவல் அறிந்த பள்ளிகொண்டா போலீசார் சம்பவ இடத்திற்கு விரைந்து சென்று இறந்த கிடந்த வெங்கடேசனின் உடலை மீட்டு பிரேத பரிசோதனைக்காக வேலூர் அடுக்கம்பாறை அரசு மருத்துவமனைக்கு அனுப்பி வைத்தனர்.விபத்து குறித்து வழக்குப்பதிவு செய்து லாரி டிரைவரிடம் விசாரணை மேற்கொண்டு வருகின்றனர்.