கட்சி பெயரை பயன்படுத்தக்கூடாது: நடிகர் விஜய் போட்ட ஆர்டர் !

‘தி கோட்’ திரைப்பட புரமோஷனுக்காக கட்சி பெயரை பயன்படுத்தக்கூடாது என விஜய் மக்கள் இயக்க நிர்வாகிகளுக்கு தமிழக வெற்றிக் கழகம் கட்சி தலைவரும், நடிகருமான விஜய் உத்தரவிட்டுள்ளார்.

நடிகர் விஜய் கடந்த பிப்ரவரி மாதம் தமிழக வெற்றிக் கழகம் என்ற கட்சியை தொடங்கினார். கட்சியை தொடங்கிய உடனேயே, கட்சி பெயரை தேர்தல் ஆணையத்தில் பதிவு செய்த அவர், கட்சியில் 2 கோடி உறுப்பினர்களை சேர்க்க இலக்கு நிர்ணயித்து நிர்வாகிகளுக்கு உத்தரவிட்டு, முதல் உறுப்பினராகவும் நடிகராக தனது பெயரை கட்சியில் பதிவு செய்து கொண்டார். இதையடுத்து, விஜய் மக்கள் இயக்க நிர்வாகிகள், தமிழக வெற்றிக் கழகம் பெயரில், தொடர்ச்சியாக பல்வேறு நலத்திட்ட உதவிகளை செய்து வருகின்றனர்.

இந்த சூழ்நிலையில், நடிகர் விஜய் தற்போது ‘தி கோட்’ திரைப்படத்தில் நடித்து வருகிறார். தற்போது வரை அந்த படத்தில் 3 பாடல்கள் வெளியாகி ரசிகர்கள் மத்தியில் மிகுந்த வரவேற்பைப் பெற்றுள்ளது. அடுத்த மாதம் 5ம் தேதி ‘தி கோட்’ படம் திரைக்கு வரவிருக்கும் நிலையில், படத்திற்கான ப்ரமோஷன் பணிகளும் தீவிரமாக நடைபெற்று வருகிறது. இந்நிலையில், ‘தி கோட்’ பட ப்ரமோஷன் பணிகளை தீவிரப்படுத்த வேண்டும் என்றும், அதே நேரத்தில் படத்தின் ப்ரமோஷனுக்காக தமிழக வெற்றிக் கழகம் பெயரை பயன்படுத்தக் கூடாது எனவும் விஜய் மக்கள் இயக்க நிர்வாகிகளுக்கும், ரசிகர்களுக்கும் நடிகர் விஜய் உத்தரவிட்டுள்ளார்.