எழும்பூர் ரயில் நிலைய டிக்கெட் கவுண்டர் இடமாற்றம்

தமிழகத்தில் முக்கிய ரயில் நிலையங்களில் ஒன்றாக எழும்பூர் ரயில் நிலையத்தை ரூ.735 கோடி மதிப்பில் மறுசீரமைக்கும் பணி கடந்த ஆண்டு பிப்ரவரி மாதம் தொடங்கியது. இந்தப் பணி தற்போது வேகமெடுத்துள்ளது. காந்தி இர்வின் சாலையை ஒட்டி இருந்த ரயில்வே குடியிருப்பு, ரயில் நிலையத்தை ஒட்டியிருந்த ரயில்வே அலுவலகம் ஆகியவை ஏற்கெனவே இடிக்கப்பட்டது.

இங்கு ரயில் நிலைய கட்டடங்கள், பன்னடுக்கு வாகன நிறுத்துமிடம் உள்பட பல்வேறு திட்டப்பணிகள் நடைபெற்று வருகின்றன. இந்த நிலையில், ரயில் நிலைய சீரமைப்பு பணிகள் காரணமாக, மின்சார ரயில் டிக்கெட் பதிவு மையம் எழும்பூர் ஆர்.பி.எஃப் அலுவலகம் வளாகத்தில் (பூந்தமல்லி சாலையை ஒட்டிய பகுதியில்) தற்காலிகமாக இடம்மாற்றம் செய்யப்பட்டுள்ளது. இது குறித்து சென்னை ரயில்வே கோட்ட அதிகாரிகள், “எழும்பூர் ரயில் நிலையத்தில் 10,11- நடைமேடையை ஒட்டி, பூந்தமல்லி பக்கத்தில் முன்பதிவு டிக்கெட் சாலை மற்றும் முன்பதிவில்லாத டிக்கெட் பதிவு மையம் செயல்பட்டதாகவும், இந்த டிக்கெட் பதிவு மையம் நேற்று காலை முதல் தற்காலிகமாக இட மாற்றம் செய்யப்பட்டு, பூந்தமல்லி சாலையில் ரயில்வே பாதுகாப்பு படை அலுவலகத்தில் டிக்கெட் பதிவு மையம் செயல்பட தொடங்கியுள்ளது.

இந்த மையத்தில் தலா 3 முன்பதிவு மற்றும் முன்பதிவில்லாத டிக்கெட் கவுன்ட்டர்கள் செயல்படுகின்றன. மொத்தம் 15 பணியாளர்கள் 8 மணி நேர ஷிஃப்டு அடிப்படையில், பணியில் இருப்பார்கள் என்று தெரிவித்துள்ளனர்