ராசிபுரம் அடுத்த அத்தனூர் பகுதியில், பொதுமக்களை அச்சுறுத்தி வந்த நல்லபாம்பு உயிருடன் மீட்பு.

நாமக்கல் மாவட்டம் ராசிபுரம் அடுத்த அத்தனூர் அண்ணா நகர் பகுதியில் கடந்த ஒரு வாரமாக இரவு நேரங்களில் நல்ல பாம்பு ஒன்று கோழி குஞ்சுகளை தின்று பொதுமக்களை அச்சுறுத்தி வந்தது. இந்நிலையில் இதே பகுதியைச் சேர்ந்த மணிகண்டன் என்பவர் தனது வீட்டு பராமரிப்பு பணியில் ஈடுபட்டுக் கொண்டிருந்தார். அப்போது நல்ல பாம்பு ஒன்று இருப்பதைக் கண்டு அச்சமடைந்தவர் ராசிபுரம் தீயணைப்பு நிலையத்திற்கு தகவல் தெரிவித்தார். சம்பவ இடத்திற்கு விரைந்து வந்த ராசிபுரம் தீயணைப்பு நிலைய வீரர்கள் பிரத்யோக கருவி மூலமாக சுமார் ஒரு மணி நேரம் போராடி சுமார் 5 அடி நீளம் உள்ள நல்ல பாம்பை உயிருடன் மீட்டு, அத்தனூர் பகுதியில் உள்ள காப்பு காடுகளில் பத்திரமாக விட்டனர் .