திருச்செந்தூர் கோவிலில் யானை தாக்கி 2பேர் பலி: பக்தர்கள் அதிர்ச்சி!

முருகப் பெருமானின் அறுபடை வீடுகளுள் இரண்டாவது படை வீடாகத் திகழ்வது திருச்செந்தூர் சுப்பிரமணிய சுவாமி கோவில். பிரசித்தி பெற்ற இந்த கோவிலில் தெய்வானை என்ற யானை வளர்க்கப்பட்டு வருகிறது. திருச்செந்தூர் வஉசி நகரைச் சேர்ந்த சதாசிவம் மகன் உதயகுமார் (45) என்பவர் யானையின் பாகனாக உள்ளார். இந்த நிலையில், உதயகுமார், தனது உறவினரான நாகர்கோவில் பகுதியைச் சேர்ந்த சிசுபாலன் (58) என்பவருடன் யானைக்கு பழம் கொடுக்க சென்றுள்ளார். அப்போது யானை அவரைப் பார்த்து மிரண்டு அவரை தாக்க முயன்றதாக கூறப்படுகிறது. இதனை தடுக்க முயன்ற உதயகுமாரையும், உறவினர் சிசுபாலன் என்பவரையும் தாக்கியது. இதில் சிசுபாலன் சம்பவ இடத்திலேயே உயிரிழந்தார். படுகாயமடைந்த யானைப் பாகன் உதயகுமார், திருச்செந்தூர் அரசு மருத்துவமனைக்கு கொண்டு செல்லப்பட்டார். அங்கு சிகிச்சை பலனின்றி உயிரிழந்தார். இந்த சம்பவம் குறித்து திருச்செந்தூர் கோவில் காவல் நிலைய போலீசார் விசாரணை நடத்தி வருகின்றனர். யானை மிதித்து பாகன் உட்பட 2 பேர் உயிரிழந்த சம்பவம் திருச்செந்தூரில் பக்தர்கள் மத்தியில் அதிர்ச்சியையும், சோகத்தையும் ஏற்படுத்தியுள்ளது.