டாஸ்மாக் கடையை உடைத்து ரூ.80ஆயிரம், மது பாட்டில்கள் கொள்ளை!.

தூத்துக்குடி மாவட்டம் எட்டயபுரம் அருகே டாஸ்மாக் கடை சுவரை உடைத்து ரூ.80ஆயிரம் பணம் மற்றும் மது பாட்டில்களை கொள்ளையடித்துச் சென்ற மர்ம நபர்களை போலீசார் தேடி வருகின்றனர். தூத்துக்குடி மாவட்டம் எட்டையாபுரம் அருகில் முத்தலாபுரம் கிராமத்தில் டாஸ்மாக் மதுபான கடை உள்ளது. இந்த கடையில் நேற்று முன்தினம் விற்பனை முடிந்த பின்னர் ஊழியர்கள் கடையை பூட்டிவிட்டு சென்றுள்ளனர். நேற்று கடையை திறக்க வந்தபோது கடையின் பின்பக்க சுவரில் உடைக்கப்பட்டு கிடந்ததை கண்டு அதிர்ச்சி அடைந்தனர். பின்னர் உள்ளே சென்று பார்த்தபோது கல்லாப் பெட்டியில் வைத்திருந்த ரூ.80ஆயிரம் பணம் மற்றும் ரூ.7,500 மதிப்புள்ள மது பாட்டில்கள் திருடுபோயிருந்தது. இந்த சம்பவம் குறித்து கடை சூப்பர்வைசர் நாகலாபுரம் பள்ளிவாசல் தெருவை சேர்ந்த பிச்சைமணி மகன் சோம குருநாதன் (49) என்பவர் எட்டயபுரம் காவல் நிலையத்தில் புகார் செய்தார். அதன் பேரில் சப் இன்ஸ்பெக்டர் நீலகண்டன் வழக்கு பதிவு செய்து மர்ம ஆசாமிகளை தேடி வருகிறார்.