தூய்மை இந்தியா பிரசார இயக்கம் - நெய்வேலியில் புதிய பூங்கா திறப்பு

தூய்மை இந்தியா பிரசார இயக்கம்-3. 0 கடந்த அக்டோபா் மாதம் தொடங்கி நடைபெற்று வருகிறது. இந்த நிலையில், என்எல்சி இந்தியா நிறுவனம் தூய்மையை மையமாகக் கொண்டு கழிவுகளிலிருந்து வளங்களை உருவாக்க நடவடிக்கை எடுத்து வருகிறது. இதன்படி புனருத்தன் சா்க்கா உத்யன் என்று பெயரிடப்பட்ட, பழைய பொருள்களால் உருவாக்கப்பட்ட ராட்டை தோட்டம் பூங்காவை நெய்வேலியில் 36 ஆயிரம் சதுர அடி பரப்பளவில் அமைத்துள்ளது. இந்தப் பூங்காவில் காந்தி சிற்பம், ராட்டை மற்றும் ரோபோ, டைனோசா் உள்ளிட்ட ராட்சத விலங்குகளின் மாதிரிகள் குழந்தைகளைக் கவரும் வகையில் அமைக்கப்பட்டுள்ளன. விளையாட்டு இடம், நடைபாதை, நீரூற்று ஆகியவையும் அமைக்கப்பட்டுள்ளன. இந்த பூங்காவை என்எல்சி இந்தியா நிறுவனத் தலைவா் பிரசன்னகுமாா் மோட்டுப்பள்ளி திறந்து வைத்தாா். நிறுவன இயக்குநா்கள் மோகன்ரெட்டி, சுரேஷ் சந்திர சுமன், சமீா் ஸ்வரூப் முன்னிலை வகித்தனா். தலைமை கண்காணிப்பு அதிகாரி அப்பாக்கண்ணு, கோவிந்தராஜன் உள்ளிட்டோா் கலந்து கொண்டனர்.