ஜல்லிக்கட்டு காளை முட்டியதில் விவசாயி பலி

தஞ்சாவூர் அருகே திருக்கானூர்பட்டியில், சனிக்கிழமை ஜல்லிக்கட்டு போட்டி நடந்தது.  இப்போட்டியில் பங்கேற்பதற்காக, கந்தர்வகோட்டை மஞ்சபேட்டையை சேர்ந்த வெங்கடாசலம் மகன் பவுன்ராஜ் (49), விவசாயி. இவர் தனது உறவினரின் காளையை ஓட்டி வந்துள்ளார். இந்நிலையில், சனிக்கிழமை மதியம் ஜல்லிக்கட்டு நடைபெறும் நுழைவாயில் முன்பு, பவுன்ராஜ் காளையுடன் நின்று கொண்டு இருந்தார். அப்போது அங்கிருந்த மற்றொரு காளை பவுன்ராஜ் வயிற்றில் குத்தியது. இதில் பவுன்ராஜ் பலத்த காயமடைந்தார். உடனடியாக, தஞ்சாவூர் மருத்துவக் கல்லுாரி மருத்துவமனையில் சிகிச்சைக்காக அனுமதிக்கப்பட்டார். ஆனால், சிகிச்சை பலனின்றி ஞாயிற்றுக்கிழமை அதிகாலை பவுன்ராஜ் உயிரிழந்தார். இதுகுறித்து வல்லம் காவல்துறையினர் விசாரித்து வருகின்றனர். காளைகளை முறையாக போட்டியாளர்கள் அழைத்து வர எவ்வித வசதியும் செய்யாத நிலையில் தான், ஒவ்வொரு காளையும் முட்டிக்கொண்ட நிலையில், பவுன்ராஜையும் காளை முட்டியதாக கூறப்படுகிறது.