டாக்டர் ராமதாஸ் பிறந்தநாளையொட்டி ஏழைகளுக்கு அன்னதானம்

சேலம் மாநகர் பகுதியில் நேற்று பா.ம.க. நிறுவனர் டாக்டர் ராமதாசின் பிறந்தநாள் விழா கொண்டாடப்பட்டது. ராஜகணபதி கோவிலில் சிறப்பு அபிஷேகம், அர்ச்சனை செய்து சிறப்பு பூஜை செய்யப்பட்டது. தொடர்ந்து பாரதி அறக்கட்டளை மூலம் ஏழை, எளிய மக்களுக்கு அன்னதானம் வழங்கப்பட்டது. சேலம் 4 ரோடு பகுதியில் பா.ம.க. கொடியேற்றும் நிகழ்ச்சி நடந்தது. சேலம் மாநகர் மாவட்ட செயலாளர் அருள் எம்.எல்.ஏ. கலந்து கொண்டு கொடியேற்றி வைத்து பள்ளி குழந்தைகளுக்கு நோட்டு, புத்தகங்கள், பேக் உள்ளிட்ட நல உதவிகளை வழங்கினார். மேலும், அழகாபுரம் மிட்டாபுதூர் அன்னை தெரசா ஆதரவற்றோர் முதியோர் இல்லத்தில் காலை உணவு வழங்கப்பட்டது. தொடர்ந்து சேலம் மேற்கு தொகுதியில் 86 இடங்களில் மரக்கன்றுகள் நடும் விழாவும், சேலம் தெற்கு தொகுதி 60-வது கோட்டம் சார்பில் கொடியேற்று நிகழ்ச்சியிலும் அருள் எம்.எல்.ஏ. கலந்து கொண்டார். இதேபோல், தாதம்பட்டி மாநகராட்சி நடுநிலைப்பள்ளியில் ராமதாசின் பிறந்தநாளையொட்டி நடந்த பேச்சு, கட்டுரை, ஓவியப்போட்டியில் வெற்றி பெற்ற மாணவ, மாணவிகளுக்கு பரிசுகள் வழங்கப்பட்டது. மேலும், பல்வேறு கோவில்களில் சிறப்பு பூஜை உள்ளிட்ட பல்வேறு நல உதவிகள் வழங்கப்பட்டது. நிகழ்ச்சிகளில் மாவட்ட தலைவர் கதிர் ராஜரத்தினம், மாவட்ட அமைப்பு செயலாளர் குமார், ராஜமாணிக்கம், மாவட்ட துணை செயலாளர் சின்னசாமி, சமயவேல், பகுதி செயலாளர்கள் சுந்தர்ராஜன், மாவட்ட இளைஞர் அணி செயலாளர் விஜயகுமார் உள்பட பலர் கலந்து கொண்டனர்.