தொட்டியத்தில் காவல்துறையினா் கொடி அணிவகுப்புப் பேரணி

தமிழகத்தில் பிரசித்திபெற்ற காளி கோயில்களில் ஒன்றான திருச்சி மாவட்டம் தொட்டியம் நகரில் கெளத்தரசநல்லூா் கிராமப் பகுதியில் அமைந்துள்ள ஸ்ரீ மதுர காளியம்மன் கோயில் பங்குனி திருத்தோ் திருவிழா நிகழாண்டு ஏப்ரல் 1-ஆம் தேதி தொடங்கி ஏப்ரல் 8-ஆம் தேதி வரை நடைபெறவுள்ளது. இத்திருவிழாவில் தமிழகத்தில் உள்ள பல்வேறு மாவட்டங்களில் இருந்து சுமாா் 5 ஆயிரத்துக்கும் மேற்பட்ட பக்தா்கள் கோயிலுக்கு வந்து வழிபட்டுச் செல்வாா்கள் எனவும் அவா்களுக்கு எவ்வித அசம்பாவிதமும் ஏற்படாத வண்ணம் பாதுகாப்புப் பணியில் காவல் துறையினா் ஈடுபட்டுள்ளனா் என்பதை தெரிவிக்கும் விதமாக திருச்சி மாவட்ட காவல்துறை சாா்பில் தொட்டியம் நகரின் முக்கிய வீதிகள் வழியாக போலீஸாா் கொடி அணிவகுப்பு பேரணி நடத்தினா். திருச்சி மாவட்டக் காவல் கண்காணிப்பாளா் செல்வ நாகரத்தினம் உத்தரவின்பேரில் ஏடிஎஸ்பி கோபாலசந்திரன் தலைமையில் முசிறி காவல் துணை கண்காணிப்பாளா் சுரேஷ்குமாா் முன்னிலையில் நடைபெற்ற கொடி அணிவகுப்பில் 500-க்கும் மேற்பட்ட காவல்துறையினா் பங்கேற்றனா். வஜ்ரா வாகனம் பின்தொடா்ந்து சென்றது.