கோவை: தொழிலதிபர் மகன் கடத்தல் - டிரைவர் மீது குண்டர் சட்டம்

தொழிலதிபர் ஸ்ரீதரின் 11 வயது மகன் ஜெயசூர்யாவை கடத்திய கார் டிரைவர் நவீன் மீது கோவை மாநகர போலீஸ் கமிஷனர் சரவண சுந்தர் குண்டர் சட்டத்தின் கீழ் கைது செய்ய நேற்று உத்தரவிட்டுள்ளார். கடந்த மாதம் 15-ம் தேதி, ஜெயசூர்யாவை டியூஷன் சென்டரில் இருந்து அழைத்து வரச் சென்ற டிரைவர் நவீன், சிறுவனை கடத்திச் சென்று ரூ. 25 லட்சம் கேட்டு மிரட்டினார். சிறுவனின் தாயார் அளித்த புகாரின் பேரில் போலீசார் நடத்திய விசாரணையில், நவீன் பவானி அருகே சிறுவனுடன் இருப்பது கண்டுபிடிக்கப்பட்டு கைது செய்யப்பட்டார். நீதிமன்ற உத்தரவின் பேரில் சிறையில் அடைக்கப்பட்டிருந்த நவீனின் ஜாமீன் மனு ஒத்திவைக்கப்பட்ட நிலையில், அவரது குற்றச்செயலின் தீவிரத்தை கருத்தில் கொண்டு தற்போது குண்டர் சட்டம் பாய்ந்துள்ளது. இந்த உத்தரவின் நகல் சிறையில் உள்ள நவீனிடம் வழங்கப்பட்டிருப்பது அப்பகுதியில் பரபரப்பை ஏற்படுத்தியுள்ளது.