பா.ஜ.க., ஆர். ராசாவுக்கு எதிராக கோவை காவல் ஆணையரிடம் புகார் !

கோவை,மத்திய உள்துறை அமைச்சர் அமித்ஷா குறித்து அவதூறாக பேசியதாக தி.மு.க எம்.பி. ஆர். ராசாவுக்கு எதிராக நடவடிக்கை எடுக்க வேண்டும் எனக் கோரி, பா.ஜ.க. சார்பில் நேற்று கோவை மாநகர காவல் ஆணையரிடம் புகார் மனு அளிக்கப்பட்டது. புகார் மனுவை அளித்த பின் பா.ஜ.க மாநில பொருளாளர் எஸ்.ஆர். சேகர் தெரிவித்ததாவது, அமித்ஷா பேசின உரையை ஆர். ராசா தவறாக விவரித்து, பாராளுமன்ற மரியாதைக்கு எதிராகக் கருத்துக்களை வெளியிட்டுள்ளார். இவரது பின்னணியில் அதிகார மையங்கள் இருப்பதாகவும், இது கவலைக்கிடமானது என்றும் கூறினார். இதே ராசா, பலமுறை இந்து சமுதாயத்தை புண்படுத்தும் வகையில் பேசியுள்ளதாகவும், ஏற்கனவே இந்த விவகாரத்தில் பா.ஜ.க முன்னாள் மாவட்டத் தலைவர் பாலாஜி உத்தமராமசாமி கைது செய்யப்பட்டு சிறையில் இருந்தார் என்றும் அவர் சுட்டிக்காட்டினார். தி.மு.க அரசு, சமூக வலைதளங்களில் கருத்து தெரிவித்தவர்களுக்கு எதிராக நடவடிக்கை எடுப்பதை போல, தங்கள் கட்சியின் எம்.பி.யின் தவறுகளுக்கும் பதிலளிக்க வேண்டும் என கூறினார்.