அரசு பஸ்சில் கடத்த முயன்ற 13 கிலோ கஞ்சா பறிமுதல்

சேலம் புதிய பேருந்து நிலையத்தில் இருந்து அரசு பஸ் வேலூருக்கு புறப்பட்டது. இதில் கண்டக்டராக சந்திரசேகர் இருந்தார். அப்போது பேருந்தில் இரண்டு பேர் பைகளுடன் ஏறினர். அவர்கள் பைகளை பேருந்தினுள் வைத்து விட்டு சந்திரசேகரிடம் பேச்சு கொடுத்தனர். பேருந்து வேலூர் சிஎம்சி வழியாக செல்லுமா, எத்தனை மணிக்கு செல்லும் என பல்வேறு கேள்விகளை கேட்டனர். அதன் பின்னர் திடீரென அவர்கள் இருவரும் பேருந்தில் இருந்து மாயமாகினர். ஆனால் அவர்கள் கொண்டு வந்த பைகள் பேருந்தினுள் இருந்தது. இதனால் அவர்கள் வருவார்கள் என சந்திரசேகர் காத்திருந்தார்.

ஆனால் நீண்ட நேரமாகியும் அவர்கள் வராததால் சந்தேகமடைந்த சந்திரசேகர் இதுபற்றி பள்ளப்பட்டி காவல்நிலையத்தில் புகார் அளித்தார். அதன்பேரில் போலீசார் அந்த பைகளை சோதனை செய்தபோது, அதில் ₹1.50 லட்சம் மதிப்பிலான 13 கிலோ 600 கிராம் கஞ்சா இருந்தது தெரிந்தது. இதையடுத்து கஞ்சாவுடன் பைகளை போலீசார் பறிமுதல் செய்தனர். மேலும் பேருந்து நிலையத்தில் உள்ள சிசிடிவி கேமராக்களில் அந்த குறிப்பிட்ட நேரத்தில் பைகளுடன் வந்த மர்மநபர்கள் யார் என போலீசார் ஆய்வு செய்து வருகின்றனர்.