கருப்பூர் அருகே லாரி மோதி வாலிபர் பலி மனைவி கண்முன்னே பரிதாபம்

சேலம் மாவட்டம் ஓமலூர் அருகே காமலாபுரத்தை அடுத்த காட்டுவளவு பகுதியைச் சேர்ந்தவர் முருகன் (வயது 33). சொந்தமாக டிராக்டர் வைத்து தொழில் செய்து வந்தார். இவருடைய மனைவி தர்ஷினி (20). இவர்களுக்கு திருமணம் முடிந்து 3 ஆண்டுகள் ஆகிறது.நேற்று மாலை முருகன், தர்ஷினி இருவரும் காமலாபுரத்தில் இருந்து சேலம் பூ மார்க்கெட் செல்வதற்காக மோட்டார் சைக்கிளில் சென்று கொண்டிருந்தனர். கருப்பூர் டோல்கேட் அருகே சென்ற போது ஒரு வழி பாதையில் தவறாக வந்த லாரி முருகன், தர்ஷினி ஆகியோர் மீது மோதியதாக தெரிகிறது. இதில் சம்பவ இடத்திலேயே முருகன் பலியானார். தர்ஷினி படுகாயம் அடைந்தார். தகவல் அறிந்த கருப்பூர் போலீசார் சம்பவ இடத்துக்கு விரைந்து வந்தனர். பலியான முருகனின் உடலை மீட்டு பிரேத பரிசோதனைக்கு சேலம் அரசு ஆஸ்பத்திரிக்கு அனுப்பி வைத்தனர். விபத்து குறித்து கருப்பூர் போலீசார் வழக்குப்பதிவு செய்தனர். லாரியை பறிமுதல் செய்த போலீசார் டிரைவரிடம் விசாரணை நடத்தினர்.