இருசக்கர வாகனத்தில் மோதிய வண்டிக்கு தீ வைத்த வாலிபர்

சேலம் அம்மாபேட்டை ராமநாதபுரத்தை சேர்ந்தவர் நடராஜன். இவர் டூவீலரில் அம்மாபேட்டை எஸ்.கே.டவுன் ஷிப் ஜங்ஷனில் வந்து கொண்டிருந்தார். அப்போது, அவ்வழியாக வந்த அயோத்தியாபட்டணத்தை சேர்ந்த கோகுல் (24) என்பவரது டூவீலரும், நடராஜனின் டூவீலரும் மோதிக்கொண்டது. இதில் இருவரது டூவீலர்களின் முன் பகுதியும் சேதமடைந்தது. இதுதொடர்பாக இருவருக்கும் வாக்குவாதம் ஏற்பட்டது. அங்கிருந்தவர்கள் இருவரையும் சமாதானப்படுத்தினர். இதையடுத்து டூவீலர் சேதமானதால், விபத்து நடந்த இடத்தில் இருந்து சற்று தள்ளி ஓரமாக டூவீலரை நிறுத்திவிட்டு நடராஜன் சென்றார். பின்னர் மீண்டும் வந்தபோது டூவீலர் தீவைத்து எரிக்கப்பட்ட நிலையில் கிடந்தது. இதனை பார்த்து அதிர்ச்சியடைந்த அவர் அம்மாபேட்டை போலீசில் புகார் அளித்தார். அதன் பேரில் போலீசார் வழக்கு பதிவு செய்து விசாரித்தனர். அதில், கோகுல் டூவீலரை தீவைத்து எரித்தது தெரிந்தது. இதையடுத்து கோகுலை போலீசார் கைது செய்து நீதிமன்றத்தில் ஆஜர்படுத்தி சிறையில் அடைத்தனர்.