இருசக்கர வாகன விபத்தில் கல்லூரி மாணவர் உயிரிழப்பு

தர்மபுரி மாவட்டம், பாலக்கோடு வட்டம் மற்றும் சட்டமன்றத் தொகுதிக்கு உட்பட்ட கொலசனஅள்ளி பகுதியைச் சேர்ந்தவர் பெருமாள். இவரது மகன் வெங்கடேசன் இவர் பாலக்கோடு அரசு கல்லூரியில் இரண்டாமாண்டு படித்து வந்தார்.நேற்று வெள்ளிச்சந்தை சென்ற வெங்கடேசன், அங்குள்ள ஓட்டலில் சாப்பிட்டு விட்டு, மீண்டும் வீடு திரும்பிக் கொண்டிருந்தார். மாரண்டஅள்ளி சாலையில் கொலசன அள்ளி அருகே சென்ற போது, நாய் ஒன்று திடீரென குறுக்கே பாய்ந்துள்ளது. அதன் மீது மோதாமல் இருப்பதற்காக, வெங்கடேசன் திடீரென பிரேக் போட்டுள்ளார். இதனால், கட்டுப்பாட்டை இழந்த டூவீலர் அப்பகுதியில் உள்ள புளிய மரத்தின் மீது மோதியது. இதில், தூக்கி வீசப்பட்டு படுகாயமடைந்த வெங்கடேசன் சம்பவ இடத்திலேயே துடி துடித்து உயிரிழந்தார். அவ்வழியாக சென்றவர்கள் திடுக்கிட்டனர். தகவலின் பேரில், மகேந்திரமங்கலம் காவல்துறையினர் சம்பவ இடம் விரைந்து சென்று, வெங்கடேசன் உடலை கைப்பற்றி பாலக்கோடு அரசு மருத்துவமனைக்கு அனுப்பி வைத்து, விபத்து குறித்து விசாரித்து வருகின்றனர்.