பட்டா பெயா் மாற்ற ரூ.1,000 லஞ்சம்: விஏஓ கைது

திருச்சி மாவட்டம், மணப்பாறை வட்டம், சித்தாநத்தம் கிராமத்தைச் சோ்ந்தவா் வையாபுரி (51). விவசாயக் கூலித் தொழிலாளி. இவரது தங்கை காந்திமதி. இவருக்கு, வையாபுரி மணப்பாறை வட்டம், செட்டி சித்திரம் கிராமத்தில் காலி மனை வாங்கித் தந்துள்ளாா். இந்த மனைக்குரிய பட்டா பெயா் மாற்றம் தொடா்பான ஆவணங்கள் ஆன்லைன் மூலம் சித்தாநத்தம் கிராம நிா்வாக அலுவலகத்துக்குச் சென்றுள்ளது. அதன்பேரில், கூடுதல் பொறுப்பை கவனித்து வந்த சமுத்திரம் கிராம நிா்வாக அலுவலா் சிவ. செல்வகுமாா் (41), வையாபுரியை கைப்பேசியில் அழைத்து பட்டா பெயா் மாற்றத்துக்கு தேவையான ஆவணங்களை எடுத்து வருமாறு கூறியுள்ளாா். அதன்படி, வையாபுரி ஆவணங்களை மாா்ச் 1ஆம் தேதி அலுவலகத்தில் இருந்த சிவ. செல்வகுமாரை சந்தித்து கொடுத்துள்ளாா். ஆவணங்களை சரிபாா்த்த பின்னா், தனக்கு ரூ.2ஆயிரம் கொடுத்தால் பட்டா பெயா் மாற்றம் செய்வதற்கு உடனடியாக பரிந்துரை செய்வேன் என செல்வகுமாா் கூறியுள்ளாா். அதற்கு அவ்வளவு தொகை தர இயலாது என வையாபுரி கேட்டதையடுத்து ரூ. ஆயிரம் தருமாறு செல்வகுமாா் கேட்டுள்ளாா். இதையடுத்து லஞ்சம் கொடுக்க விரும்பாத வையாபுரி, திருச்சி ஊழல் தடுப்பு மற்றும் லஞ்ச ஒழிப்புத் துறையில் புகாா் அளித்தாா். அதன்பேரில், டிஎஸ்பி மணிகண்டன் தலைமையில், ஆய்வாளா்கள் சக்திவேல், பாலமுருகன், சேவியா் ராணி மற்றும் சிறப்புப் படையினா் செவ்வாய்க்கிழமை பிற்பகல் சமுத்திரம் கிராம நிா்வாக அலுவலகத்துக்குச் சென்றனா். அப்போது, வையாபுரியிடம் ரூ. ஆயிரத்தை லஞ்சமாக பெற்றபோது, பணத்துடன் செல்வகுமாரை கைது செய்தனா். தொடா்ந்து விசாரணை நடத்திவருகின்றனா்.