முசிறி அருகே போலீஸ் வாகனம் சேதம்: 24 போ் மீது வழக்கு

சீலைப்பிள்ளையாா்புத்தூா் கிராமத்தில் வாய்க்கால் பாலத்தின் சுவரில் குறிப்பிட்ட சமுதாயத்தினரை விமா்சனம் செய்து அவதூறு வாா்த்தைகளால் துண்டுப் பிரசுரம் ஒட்டப்பட்டிருந்த சம்பவத்தால் அப்பகுதியில் பெரும் பரபரப்பு ஏற்பட்டது. இதனால் சீலைப் பிள்ளையாா்புத்தூா் பகுதியில் போலீஸாா் பாதுகாப்புப் பணியில் ஈடுபட்டிருந்தனா். இதனால் அப்பகுதியில் பதற்றமான சூழல் நிலவியது. இந்நிலையில், வியாழக்கிழமை இரவு ஆயுதப்படை வேன் மோதியதில் இருசக்கர வாகனத்தில் வந்த மருதாயி(38) சம்பவ இடத்திலேயே உயிரிழந்தாா். மேலும் இருவா் காயமடைந்தனா். இதையடுத்து, அங்கிருந்த பொதுமக்கள் போலீஸ் வாகனத்தையும், பொது சொத்தையும் சேதப்படுத்தியது, காவலா்களைப் பணி செய்ய விடாமல் தடுத்தது என்பன உள்ளிட்ட பல்வேறு பிரிவுகளில் சீலைபிள்ளையாா்புத்தூரைச் சோ்ந்த 24 போ் மீது காட்டுப் புத்தூா் போலீஸாா் வழக்குப் பதிந்து அவா்களைத் தேடி வருகின்றனா்.