வெள்ளாடுகள் வளர்ப்பில் விவசாயிகள் ஆர்வம்

காஞ்சிபுரம் மாவட்டம் அடுத்த ராஜம்பேட்டை, கரும்பாக்கம், மிளகர்மேனி களியப்பேட்டை உள்ளிட்ட கிராம பகுதிகளில், சாகுபடி பணியோடு, கால்நடைகள் பராமரிப்பிலும் விவசாயிகள் ஆர்வம் காட்டி வருகின்றனர். வெள்ளாடுகள் வளர்ப்பு குறைந்த செலவில் அதிக லாபம் கிடைப்பதாகவும், பராமரிப்பது எளிமையாக இருப்பதாகவும் கூறுகின்றனர். இதுகுறித்து, ராஜம்பேட்டை கால்நடை பராமரிப்போர் கூறியதாவது: வெள்ளாட்டு வளர்ப்பில் அதிக அளவிலான இனப்பெருக்கம், இறப்பு விகிதம் குறைவு. வீட்டின் அருகே கொட்டகை அமைத்து, விவசாய நிலத்தில் ஊடுபயிராக தீவனப்புல் வளர்த்து ஆடுகளை மேய்ச்சலுக்கு விடுகிறோம். ஒரு கிலோ ஆட்டுக்கறி 800 ரூபாய்க்கு மேல் விற்பனை செய்யப்படுவதால், ஆடு வளர்ப்பில் நல்ல லாபம் கிடைக்கிறது. இவ்வாறு அவர்கள் கூறினர்.