கார் - பைக் மோதல் : சமோசா வியாபாரி பலி

புதுக்கோட்டை மாவட்டம், ஆவுடையார் கோயில் பகுதியை சேர்ந்தவர் மைக்கேல் பிரபு வயது 30. இவர் தனது சகோதரருடன் ஈரோடு மாவட்டம், சென்னிமலை பகுதியில் தங்கி சமோசா தயாரித்து விற்பனை செய்து வருகிறார். இந்த நிலையில் வழக்கம் போல் தனது பைக்கில் வியாபாரத்திற்கு கடைகளுக்கு சமோசா இறக்க வந்துள்ளார்.

அப்போது திட்டுப்பாறை அருகே வந்து கொண்டிருந்த போது ஈரோடு மாவட்டத்தை சேர்ந்த குமரவேல் என்பவர் ஓட்டி வந்த கார் பைக் மீது மோதியதில் தூக்கி வீசப்பட்டு கீழே விழுந்தார். அதில் மைக்கேல் பிரபுக்கு பலத்த காயம் ஏற்பட்டது. உடனே அருகில் இருந்தவர்கள் உதவியுடன் தனியார் ஆம்புலன்ஸ் மூலம் காங்கேயம் அரசு தலைமை மருத்துவமனையில் சிகிச்சைக்கு சேர்த்துள்ளனர். பின்னர் முதலுதவி அளிக்கப்பட்டு மேல் சிகிச்சைக்காக கோவை தனியார் மருத்துவமனைக்கு அனுப்பி வைத்துள்ளனர்.

கோவை மருத்துவமனையில் பரிசோதித்த மருத்துவர் அவர் வரும் வழியிலேயே இறந்து விட்டதாக தெரிவித்துள்ளனர். இதனை அடுத்து அவரது உடல் பிரேத பரிசோதனைக்காக கோவை அரசு மருத்துவமனையில் வைக்கப்பட்டுள்ளது. மேலும் இந்த விபத்து குறித்து காங்கேயம் போலீசார் வழக்கு பதிவு செய்து விசாரணை நடத்தி வருகின்றனர்.‌