சேலத்தில் கஞ்சா விற்ற 2 பேர் கைது - 4 கிலோ கஞ்சா பறிமுதல்

சேலம் மாநகரில் சிலர் கஞ்சா விற்பனையில் ஈடுபட்டு வருவதாக மாவட்ட போதை பொருள் தடுப்பு பிரிவு போலீசாருக்கு தகவல் கிடைத்தது. நேற்று முன்தினம் போலீஸ் இன்ஸ்பெக்டர் பாபு சுரேஷ்குமார் தலைமையில் போலீசார் மரவனேரி சாலையில் கண்காணிப்பு பணியில் ஈடுபட்டனர். அந்த பகுதியில் சந்தேகத்துக்கு இடமளிக்கும் வகையில் நின்ற 2 வாலிபர்களை பிடித்து போலீசார் விசாரணை நடத்தினர். இதில் அவர்கள் வீராணம் பகுதியை சேர்ந்த மணிகண்டன் (வயது 26), களரம்பட்டியை சேர்ந்த இளையராசு (25) ஆகியோர் என்பது தெரியவந்தது. 

அவர்கள் வைத்திருந்த பையை போலீசார் சோதனை செய்தனர். இதில் 4 கிலோ கஞ்சா இருந்தது கண்டுபிடிக்கப்பட்டது. கஞ்சா விற்பனையில் ஈடுபட்ட அவர்களை போலீசார் கைது செய்தனர். அவர்களிடம் இருந்து கஞ்சா மற்றும் மோட்டார் சைக்கிள்கள், 2 செல்போன்கள் பறிமுதல் செய்யப்பட்டன. போலீசார் விசாரணையில் கைதான 2 பேரும் வலசையூர் பகுதியை சேர்ந்த ஒருவரிடம் கஞ்சா வாங்கி விற்பனை செய்து வந்தது தெரியவந்தது. அந்த நபரை போலீசார் வலைவீசி தேடி வருகின்றனர்.